निफ्रालाई ५ अर्ब रुपैयाँ बराबरको ऊर्जा ऋणपत्र निष्कासन गर्न सेबोनको अनुमति

काठमाडौं । नेपाल धितोपत्र बोर्ड (सेबोन) ले नेपाल इन्फ्रास्ट्रक्चर बैंक लिमिटेड (निफ्रा) लाई ५ अर्ब रुपैयाँ बराबरको ऊर्जा ऋणपत्र (Energy Bond) निष्कासन गर्न अनुमति दिएको छ।

निफ्राले कुल ५० लाख इकाई ऋणपत्र निष्कासन गर्नेछ, जसको प्रतिइकाई मूल्य १ हजार रुपैयाँ तोकिएको छ। उक्त ऋणपत्रमध्ये २ अर्ब रुपैयाँ बराबरको २० लाख इकाई सर्वसाधारणलाई सार्वजनिक निष्कासनमार्फत जारी गरिनेछ।

बाँकी ३ अर्ब रुपैयाँ बराबरको ३० लाख इकाई भने बैंकले आफ्नै पहलमा अन्य संघ–संस्थाहरूलाई बिक्री गर्नेछ। यो बिक्री प्रक्रिया निफ्राले व्यक्तिगत र संस्थागत लगानीकर्तासँग प्रत्यक्ष समन्वय गरेर अघि बढाउनेछ।

ऋणपत्र निष्कासनको व्यवस्थापन एनआइएमबी एस क्यापिटल लिमिटेडले गर्नेछ। उर्जा क्षेत्रमा लगानी प्रवाह गर्न र दीर्घकालीन पूँजी संकलन गर्न निफ्राले ऋणपत्र निष्कासन गर्न लागेको जनाएको छ।

प्रतिक्रिया दिनुहोस्