काठमाडौं । देशभर जेनजी आन्दोलनका क्रममा भएको आगजनी र तोडफोडका कारण २३ अर्ब १९ करोड रुपैयाँ बढीको बीमा दाबी परेको छ ।
नेपाल बीमा प्राधिकरणले आज सार्वजनिक गरेको पछिल्लो (असोज २८ ) सम्मको तथ्यांकअनुसार १४ वटा निर्जीवन बीमा कम्पनी र ४ वटा लघु निर्जीवन बीमा कम्पनीमा ३ हजार १६३ वटा दाबी परेका छन् । भदौ २३ र २४ गते भएको आन्दोलनका क्रममा भएको भौतिक क्षतिमा २३ अर्ब १९ करोड ३६ लाख रुपैयाँ बराबर दाबी परेको प्राधिकरणले जनाएको छ।
बीमा कम्पनीहरूले असोज २८ गतेसम्ममा १ अर्ब ९५ करोड ४७ लाख रुपैयाँ बराबरको दाबी भुक्तानी गरिसकेका छन् ।
कुनमा कम्पनीमा कति पर्यो बीमा दाबी ?
प्राधिकरणका अनुसार असोज २८ गतेसम्म सबैभन्दा धेरै दाबी सिद्धार्थ प्रिमियर इन्स्योरेन्स कम्पनीमा परेको छ । ३९४ वटा दाबी परेको इन्स्योरेन्सले ५ अर्ब ४८ करोड ५४ लाख रुपैयाँको दाबी भुक्तानी गर्नुपर्नेछ । जसमध्ये कम्पनीले बीमितलाई ७८ करोड ८ लाख रुपैयाँ भुक्तानी गरेको उल्लेख छ ।
दोस्रोमा ओरिएन्टल कम्पनीमा ५ अर्ब २४ करोड ८२ लाख रुपैयाँको ९८ वटा दाबी परेका छन् । जसमध्ये कम्पनीले ७१ लाख रुपैयाँ भुक्तानी गरिसकेको छ । यस्तै, तेस्रो धेरै दाबी पर्ने कम्पनीमा आइजीआई प्रुडेन्सियल रहेको छ । २ अर्ब ७९ करोड ४८ लाख रुपैयाँ बराबरको दाबी परेकोमा कम्पनीले ३० करोड ७६ लाख रुपैयाँ भुक्तानी गरिसकेको छ।
त्यस्तै, शिखर इन्स्योरेन्समा २ अर्ब ४१ करोड ११ लाख रुपैयाँको ४३३ वटा, सगरमाथा लुम्बिनीमा १ अर्ब ५९ करोड ३८ लाख रुपैयाँको ३४२ वटा, नेको इन्स्योरेन्समा १ अर्ब १५ करोड ५४ लाख रुपैयाँको २५९ वटा दाबी परेका छन् । यसैगरी, हिमालयन एभरेष्टमा ९८ करोड ६२ लाख रुपैयाँ बराबरको २७० वटा दाबी परेको प्राधिकरणले जनाएको छ । भुक्तानीतर्फ भने शिखर इन्स्योरेन्सले ४२ करोड २७ लाख रुपैयाँ, सलिकोले २ करोड ७९ लाख रुपैयाँ, हिमालयन एभरेष्टले २४ करोड ५३ लाख रुपैयाँ र नेकोले ८ करोड ३९ लाख रुपैयाँ भुक्तानी गरिसकेका छन् ।
सानिमा जीआईसीमा ८८ करोड ८५ लाख रुपैयाँ, युनाइटेड अजोडमा ६३ करोड ९४ लाख रुपैयाँ, राष्ट्रिय बीमा कम्पनीमा ५८ करोड ४१ लाख रुपैयाँ, नेपाल इन्स्योरेन्समा ४६ करोड ८९ लाख रुपैयाँ, एनएलजी इन्स्योरेन्समा ६० करोड ५८ लाख रुपैयाँ, प्रभु इन्स्योरेन्समा २१ करोड ८ लाख रुपैयाँ र नेशनल इन्स्योरेन्समा ८ करोड ५७ लाख रुपैयाँ बराबरको बीमा दाबी परेको छ ।
जसमध्ये सानिमाले २ लाख रुपैयाँ, एनएलजीले ३९ लाख रुपैयाँ, नेपाल इन्स्योरेन्सले ५ करोड २७ लाख रुपैयाँ, युनाइटेडले १ करोड ७८ लाख रुपैयाँ प्रभुले १४ लाख रुपैयाँ भुक्तानी गरेको जनाएका छन् । लघु बीमा कम्पनीहरूमा प्रोटेक्टिभमा १ करोड ३९ लाख रुपैयाँ, स्टार माइक्रोमा ७२ लाख रुपैयाँ बराबरको दाबी पर्दा ट्रस्ट माइक्रोमा ६५ लाख, तथा नेपाल माइक्रोमा ५९ लाख रुपैयाँको बीमा दाबी परेको छ । जसमध्ये प्रोटेक्टिभले २ लाख, ट्रस्टले २२ लाख र नेपाल माइक्रोले २ लाख रुपैयाँ दाबी भुक्तानी गरेको प्राधिकरणले जनाएको छ।
प्रतिक्रिया दिनुहोस्