काठमाडौं । अर्थमन्त्री रामेश्वर प्रसाद खनालले मोरङस्थित केराबारी गाउँपालिकाको करदाता सेवा कार्यालय भवन हस्तान्तरण गरेका छन् । भवन हस्तान्तरण गर्दै अर्थमन्त्री खनालले आजको दिन प्रशासनिक संघीयतामा ऐतिहासिक दिन भएको बताए ।
उनले वित्तीय संघीयतालाई अघि बढाएपनि प्रशासनिक संघीयता कमजोर रहेको अवस्थामा कार्यालय भवन हस्तान्तरणले कर प्रशासनको कामलाई विकेन्द्रित गर्दै प्रशासनिक संघीयतालाई थप मजबुद बनाउन सहयोग पुग्ने विश्वास व्यक्त गरे ।
यस्तै उनले करदातालाई सहजता, कर भुक्तानीको लागत र समय घट्ने, विकृत व्यवहार कम हुने, स्थानीय सरकारको आयस्रोत सक्षमता करको आधारमा वृद्धि हुने, सुशासन प्रवद्र्धन गर्ने कार्यमा यो कार्यक्रम महत्वपूर्ण सावित हुने समेत धारणा राखे । सो अवसरमा अर्थमन्त्री खनालले केराबारी गाउँपालिकाबाट पहिलो व्यवसायिक स्थायी लेखा नम्बर ‘दि भ्वाइस क्याफे एण्ड रेष्ट्रो’ र व्यक्तिगत स्थायी लेखा नं. चित्रकुमार तमाङ्गसाई प्रदान गरी करदाता सेवा कार्यालयको काम स्थानीय तहमा हस्तान्तरण गरे ।
बुधबार नै अर्थमन्त्रीको उपस्थितिमा केरावारी गाउँपालिका र आ.रा.का. विराटनगरका प्रमुखबीचमा समझदारी पत्रमा हस्ताक्षर भई सेवा कार्यालयको काम हस्तान्तरण भएकामा राजस्व प्रणालीमा स्थानीय तहको प्रभावकारी भूमिका स्थापना हुने केरावारी गाउँपालिकाका अध्यक्ष सुमन मिरिचिङको भनाइ छ ।
यस्तै, उनले नेपालको कर प्रशासन प्रणालीको सुदृढीकरणमा सुधारको दृष्टिले एक ऐतिहासिक क्षणका रूपमा रहेको उल्लेख गरे । उनले गाउँपालिकामा करदाता सेवाको काम हस्तान्तरण गरेसँगै उद्योगी, व्यवसायी, करदातासँगै अग्रीम आयकर कट्टी गरी दाखिला गर्ने निकायहरूले अब आफ्नै नजिकको गाउँ वा नगरपालिकाका कार्यालयबाट सहज रुपमा सेवा पाउने धारणा राखे ।
प्रतिक्रिया दिनुहोस्