काठमाडौं । नेपालको अटोमोबाइल क्षेत्रको छाता संगठन नाडा अटोमोबाइल्स एशोसियसन अफ नेपाल (नाडा)को नयाँ नेतृत्वमा सुरेन्द्रकुमार उप्रेती चयन भएका छन् । नाडाको आगामी कार्यकालका लागि वर्तमान महासचिव सुरेन्द्रकुमार उप्रेती निर्विरोध अध्यक्षमा निर्वाचित भएका हुन् ।
आगामी पुस २५ गते नाडाको निर्वाचन हुँदैछ । यसका लागि आज (बिहीबार मध्याह्न १२ बजेसम्म) उम्मेदवारी दर्ताको समय निर्धारण गरिएको थियो। तोकिएको समयसीमाभित्र अध्यक्ष पदका लागि उप्रेतीको एकल उम्मेदवारी परेपछि उनी निर्विरोध अध्यक्ष चुनिएका हुन् । तर, नाडा निर्वाचन समितिले यसको औपचारिक घोषणा भने गर्न बाँकी छ ।
उप्रेती लामो समयदेखि नाडाको विभिन्न जिम्मेवारीमा रहेर अटोमोबाइल क्षेत्रको उत्थानमा सक्रिय छन् । उनले यसअघि नाडाको कोषाध्यक्ष र महासचिवको जिम्मेवारी सम्हालिसकेका छन् ।
यस्तै, उनी व्यवसायिक रूपमा एसटीसी ग्रुपका प्रबन्ध निर्देशक हुन् । नेपालमा टायर, ब्याट्री, लुब्रिकेन्ट स्पेयर पार्टसलगायतका अटो क्षेत्रको व्यवसायमा उनको ग्रुपले बलियो उपस्थिति जनाउँदै आएको छ।
प्रतिक्रिया दिनुहोस्