वाणिज्य बैंकहरूको ब्याजदर माघमा थप घट्यो, व्यक्तिगत मुद्दतीको औसत ४.६८ प्रतिशतमा सीमित

काठमाडौं । वाणिज्य बैंकहरूले माघ महिनाका लागि निक्षेपको ब्याजदर थप घटाएका छन् । उच्च तरलता, कमजोर कर्जा प्रवाह तथा वित्तीय प्रणालीमा लगानीयोग्य रकम पर्याप्त रहेको अवस्थाका कारण बैंकहरूको ब्याजदर निरन्तर ओरालो लागेको हो ।

२० वटा वाणिज्य बैंकले सार्वजनिक गरेको ब्याजदर सूचीअनुसार माघ महिनामा व्यक्तिगत मुद्दती निक्षेपमा दिने अधिकतम ब्याजदर औसतमा पुसको तुलनामा ०.१४९५ प्रतिशत विन्दुले घटेको छ । पुसमा औसत ४.८३४ प्रतिशत रहेको अधिकतम ब्याजदर माघमा घटेर ४.६८४५ प्रतिशतमा झरेको छ ।

बैंकिङ प्रणालीमा व्यक्तिगत मुद्दती निक्षेपको ब्याजदर घट्दा बचत तथा संस्थागत मुद्दती निक्षेपको ब्याजदरमा समेत असर पर्छ । निक्षेपको ब्याजदर घटेसँगै आधार दर कम हुने र त्यसको प्रत्यक्ष प्रभाव कर्जाको ब्याजदरमा देखिने बैंकिङ क्षेत्रका जानकारहरू बताउँछन् ।

माघ महिनामा व्यक्तिगत मुद्दती निक्षेपको अधिकतम ब्याजदर ५.५ प्रतिशतमै सीमित रहेको छ । ग्लोबल आईएमई बैंकले सबैभन्दा बढी ५.५ प्रतिशत ब्याजदर कायम राखेको छ ।

पुसको तुलनामा माघमा ११ वटा वाणिज्य बैंकले व्यक्तिगत मुद्दती निक्षेपको अधिकतम ब्याजदर घटाएका छन् । आठ बैंकले ब्याजदर स्थिर राख्दा एक बैंकले सामान्य वृद्धि गरेको छ । अधिकांश बैंकले ब्याजदर घटाएकै कारण औसत ब्याजदर ओरालो लागेको हो ।

ब्याजदर घटाउने बैंकहरूमा कृषि विकास बैंक, एभरेस्ट बैंक, लक्ष्मी सनराइज बैंक, माछापुच्छ्रे बैंक, स्ट्यान्डर्ड चार्टर्ड बैंक, सिद्धार्थ बैंक, कुमारी बैंक, सानिमा बैंक, हिमालयन बैंक, नेपाल एसबीआई बैंक र सिटिजन्स बैंक रहेका छन् ।

त्यसैगरी नेपाल बैंक, एनआईसी एसिया बैंक, प्रभु बैंक, राष्ट्रिय वाणिज्य बैंक, नबिल बैंक, ग्लोबल आईएमई बैंक, नेपाल इन्भेस्टमेन्ट मेगा बैंक र एनएमबी बैंकले ब्याजदर स्थिर राखेका छन् । प्राइम कमर्सियल बैंकले भने व्यक्तिगत मुद्दतीको ब्याजदर सामान्य रूपमा बढाएको छ ।

बैंकहरूले छोटो अवधिको मुद्दती निक्षेपमा तुलनात्मक रूपमा न्यून र लामो अवधिका लागि केही बढी ब्याजदर तोक्ने अभ्यास गर्दै आएका छन् । कर्जा प्रवाह अपेक्षित रूपमा बढ्न नसक्दा बैंकहरूमा लगानीयोग्य रकम थुप्रिँदै गएको र त्यसकै कारण ब्याजदर घटिरहेको बैंकहरूको भनाइ छ ।

यसैबीच, नेपाल राष्ट्र बैंकले वित्तीय प्रणालीको तरलता अवस्था र अन्तरबैंक ब्याजदर व्यवस्थापन गर्न बोन्ड, स्थायी निक्षेप सुविधा लगायतका मौद्रिक उपकरणमार्फत लामो अवधिका लागि समेत तरलता खिच्दै आएको छ ।

प्रतिक्रिया दिनुहोस्