काठमाडाैं । प्रिमियर इन्टरनेशनल आईबी कन्टिन्युम स्कुलले अन्तर्राष्ट्रिय ख्यातिप्राप्त बास्केटबल प्रशिक्षक, मेन्टर तथा खेल विकास क्षेत्रका विज्ञ नेल्स हकिन्सनद्वारा विशेष बास्केटबल मास्टरक्लास आयोजना गरेको छ।
विद्यालयमा आयोजित उक्त मास्टरक्लासमा प्रिमियर इन्टरनेशनल स्कुलका छात्रा तथा छात्र बास्केटबल टोलीका खेलाडीसँगै प्रिमियर स्पोर्ट्स एकेडेमीका खेलाडीहरूको सक्रिय सहभागिता रहेको थियो। कार्यक्रममा खेल शिक्षामार्फत समग्र विद्यार्थी विकास गर्ने विद्यालयको प्रतिबद्धता स्पष्ट रूपमा देखिएको थियो।
ट्रिनिटी वेस्टर्न युनिभर्सिटी र सिएटल प्यासिफिक युनिभर्सिटीमा खेलाडी तथा प्रशिक्षकका रूपमा अनुभव हासिल गरेका हकिन्सनले पछि ओलम्पिक सोलिडारिटी र एफआईबीए बास्केटबल विकास कार्यक्रमअन्तर्गत नेतृत्वदायी भूमिका निर्वाह गर्दै विश्वका विभिन्न देशमा बास्केटबल विकासमा योगदान पुर्याउँदै आएका छन्।
एक घण्टासम्म चलेको मास्टरक्लासमा हकिन्सनले सहनशक्ति विकास, खेल बुझाइ (गेम इन्टेलिजेन्स), आधारभूत सीप सुदृढ गर्ने उपाय तथा वास्तविक खेल परिस्थितिमा प्रयोग गर्न सकिने व्यावहारिक प्रशिक्षण प्रदान गरे। साथै, उनले चुनौतीलाई अवसरका रूपमा लिनु, अनुशासनमा रहनु र उपलब्ध सम्भावनाको पूर्ण उपयोग गर्नुको महत्त्वमा विशेष जोड दिए।
प्रशिक्षणका क्रममा हकिन्सनले जित–हारको अंकभन्दा बाहिर सोच्न खेलाडीहरूलाई प्रेरित गर्दै खेलाडीको सोच, तयारी, दैनिक बानी–व्यवहार तथा मैदानबाहिर गरिने निर्णयहरूले खेल प्रदर्शनमा पार्ने प्रभावबारे गहिरो सन्देश दिएका थिए।
मास्टरक्लासमा सहभागी विद्यार्थीहरूले यस अनुभवलाई अत्यन्त प्रेरणादायी भएको बताउँदै जितभन्दा दीर्घकालीन विकास, आत्मअनुशासन र जिम्मेवारीबोधमा केन्द्रित हुन सहयोग पुगेको प्रतिक्रिया दिएका छन्।
यो कार्यक्रम नेपाल विश्वविद्यालय खेलकुद संघ (एनयुएसए) को सहकार्य र समर्थनमा सम्पन्न भएको हो। उक्त साझेदारीले प्रिमियरका युवा खेलाडीहरूलाई अन्तर्राष्ट्रिय स्तरको सिकाइ अनुभव प्राप्त गर्ने अवसर प्रदान गरेको विद्यालयले जनाएको छ।
प्रिमियर इन्टरनेशनल आईबी कन्टिन्युम स्कुलमा खेल शिक्षा प्रतिस्पर्धामा मात्र सीमित नभई चरित्र निर्माण र जीवन सीप विकाससँग जोडिएको विद्यालयको धारणा रहेको छ।
अन्तर्राष्ट्रिय अनुभवी मेन्टरहरूसँग विद्यार्थीलाई जोड्दै विद्यालयले आत्मविश्वासी, अनुशासित र सोच्न सक्ने क्षमतायुक्त विद्यार्थी उत्पादन गर्ने लक्ष्यलाई निरन्तर अघि बढाइरहेको जनाएको छ।
प्रतिक्रिया दिनुहोस्