कर्पोरेट समाचार 
काठमाडौं । भारतले आसन्न फागुन २१ को निर्वाचन प्रयोजनका निम्ति सरकारलाई २०० बढी सवारीसाधन नेपाल सरकारलाई हस्तान्तरण गरेको छ ।
बिहीबार नेपालका निम्ति भारतीय कार्यवाहक राजदूत डा. राकेश पाण्डेले अर्थ मन्त्रालयमा आयोजित कार्यक्रममा २ सय भन्दा बढी सवारीसाधन औपचारिक रूपमा नेपाल सरकारलाई हस्तान्तरण गरेका छन् । अर्थमन्त्री रामेश्वर खनालले नेपाल सरकारले भारतसँग गरेको अनुरोधका आधारमा भारत सरकारले विभिन्न किसिमका ६५० वटा सवारी उपलब्ध गराउने क्रममा आज दोस्रो पटक २२० सवारी साधन प्रदान गरेको बताए । ‘भारत सरकारले विभिन्न किसिमका ६५० वटा सवारी नेपाल सरकारलाई दिँदै छ । सोही क्रममा आज दोस्रो लटमा २२० वटा सवारी साधन दिएको छ । यसपछि दुई वा तीन लटमा पूरै गाडीहरु आउँछन्’ अर्थमन्त्री खनालले भने।
सो कार्यक्रममा अर्थमन्त्री खनालले भारत र नेपालबीचको लामो समयदेखिको सहयोग र मैत्रीपूर्ण सम्बन्ध स्मरण गरे।
यस्तै उनले नेपाल पहरीलाई आवश्यक अरु उपकरणहरु पनि भारत सरकारले दिन लागेको जानकारी दिए । भारत सरकारले निर्वाचनसँग सम्बन्धित सहयोगको पहिलो किस्ताअन्तर्गत यही माघ ६ गते ६० वटा भन्दा बढी संख्यामा डबल क्याब पिकअप सवारीसाधन नेपाललाई हस्तान्तरण गरेको थियो । नेपाल सरकारको आग्रहमा भारतले सन् २००८ देखि नेपाललाई निर्वाचनसम्बन्धी सहयोग उपलब्ध गराउँदै आएको छ ।
हेर्नुहोस् तस्बिरहरु :
प्रतिक्रिया दिनुहोस्