काठमाडौं । सुपर खुदी हाइड्रोपावर लिमिटेडको प्रारम्भिक सार्वजनिक निष्कासन (आईपीओ) आज बाँडफाँड गरिएको छ । कम्पनीले फागुन ५ गतेदेखि ११ गतेसम्म सर्वसाधारणका लागि खुला गरेको आईपीओको बाँडफाँड धितोपत्र बिक्री प्रबन्धक ग्लोबल आइएमई क्यापिटल लिमिटेडको काठमाडौंस्थित नक्साल कार्यालयमा बिहान सम्पन्न भएको जनाएको छ ।
ग्लोबल आइएमई क्यापिटलका अनुसार कम्पनीको आईपीओमा कुल २६ लाख २० हजार ३४१ आवेदकबाट २ करोड ८१ लाख ६४ हजार ९५० कित्ता शेयर खरिदका लागि आवेदन परेको थियो । तीमध्ये २ करोड ७७ लाख ३ हजार ८८० कित्ता शेयरका लागि परेको २५ लाख ८० हजार ४७० आवेदन सदर भएको छ भने ३९ हजार ८७८ आवेदन बदर भएका छन् ।
सदर भएका आवेदकमध्ये गोलाप्रथामार्फत १ लाख २८ हजार ६५० जनालाई १० कित्ताका दरले कुल १२ लाख ८६ हजार ५ सय कित्ता सेयर बाँडफाँड गरिएको छ। अत्यधिक मागका कारण अधिकांश आवेदकले शेयर पाउन नसकेको बिक्री प्रबन्धकले जनाएको छ । आईपीओको नतिजा ‘मेरो शेयर’ प्रणाली तथा सिडिएस एण्ड क्लियरिङ लिमिटेडको वेबसाइटमार्फत हेर्न सकिने जनाइएको छ ।
प्रतिक्रिया दिनुहोस्