काठमाडौं । इरानले प्रस्तुत गरेको १४ बुँदे शान्ति प्रस्तावमा अमेरिकाले पठाएको प्रतिक्रिया हाल समीक्षाको क्रममा रहेको जनाएको छ। इरानको विदेश मन्त्रालयका प्रवक्ता इस्माइल बाघेईका अनुसार आगामी वार्ताहरू केवल युद्ध अन्त्य गर्ने विषयमा मात्र केन्द्रित रहनेछन्।
तेहरानमा आयोजित साप्ताहिक पत्रकार सम्मेलनमा बोल्दै प्रवक्ता बाघेईले युरेनियम संवर्धन वा आणविक सामग्रीसम्बन्धी अड्कलबाजीलाई अस्वीकार गरे। उनले यस्ता विषयहरू अहिले वार्ताको कार्यसूचीमा नरहेको स्पष्ट पार्दै वर्तमान चरणमा युद्धको पूर्ण अन्त्य बाहेक अन्य विषयमा छलफल नभइरहेको बताए।
‘अहिलेको चरणमा हामी युद्धको पूर्ण अन्त्य बाहेक अन्य कुनै पनि विषयमा छलफल गरिरहेका छैनौं,’ बाघेईले भने, ‘भविष्यमा हामी कुन दिशा लिनेछौं भन्ने निर्णय समयअनुसार गरिनेछ।’
यसैबीच, अमेरिकी राष्ट्रपति डोनाल्ड ट्रम्पले हर्मुज जलमार्गबाट जहाज आवागमनलाई ‘मानवीय उदारता’ भनी दिएको अभिव्यक्तिप्रति पनि बाघेईले आपत्ति जनाएका छन्। उनले विश्वले अमेरिकाको ‘मानवीयताको दाबी’ स्वीकार नगर्ने बताएका छन्। साथै, इरानविरुद्ध प्रयोग गरिने धम्कीपूर्ण भाषा प्रभावकारी नहुने चेतावनी दिँदै हालको जलसन्धि तनाव अमेरिका र इजरायलको सैन्य आक्रमणको प्रत्यक्ष परिणाम भएको दाबी गरे।
यसअघि अप्रिलको अन्त्यतिर इरानी विदेशमन्त्री सैयद अब्बास अराघचीले ओमानको भ्रमण गरी त्यहाँका अधिकारीहरूसँग हर्मुज जलमार्गमा सुरक्षित जहाज पारवहन सुनिश्चित गर्ने उपायबारे छलफल गरेका थिए। बाघेईका अनुसार इरान र ओमान दुवै हर्मुज जलमार्गका तटीय देश भएकाले सुरक्षित आवागमनका लागि विशेष संयन्त्र र प्रोटोकल विकास गर्न आवश्यक छ।
यस विषयमा सम्बन्धित वार्ताहरू आगामी दिनहरूमा पनि जारी रहने अपेक्षा गरिएको छ। फेब्रुअरीको अन्त्यमा इजरायल र अमेरिकाले तेहरानसहित अन्य इरानी सहरहरूमा संयुक्त आक्रमण गरेपछि द्वन्द्व चर्किएको थियो। त्यसको प्रतिकारस्वरूप इरानले इजरायल तथा क्षेत्रीय अमेरिकी स्वार्थहरूमा मिसाइल र ड्रोन आक्रमण गरेको थियो।
इरानले हर्मुज जलमार्गमा कडाइ गरेपछि विश्वव्यापी तेल आपूर्तिमा असर परेको छ भने अमेरिकाले दबाब बढाउन लामो समयसम्म नौसैनिक नाकाबन्दी गरेको थियो। अप्रिल ८ देखि युद्धविराम लागू भएपछि इस्लामावादमा इरानी र अमेरिकी प्रतिनिधिमण्डलबीच वार्ता भए पनि कुनै ठोस सम्झौता हुन सकेको थिएन।
त्यसपछि अप्रिल ३० मा इरानले पाकिस्तानमार्फत अमेरिकालाई १४ बुँदे शान्ति प्रस्ताव पठाएको थियो, जसको प्रतिक्रिया अहिले अध्ययन भइरहेको छ।
प्रतिक्रिया दिनुहोस्