कर्पोरेट समाचार 
म्याग्दी । म्याग्दीमा निर्माणाधीन १३२ केभी क्षमताको डाडाखेत–राहुघाट प्रसारण लाइन आयोजनाका लागि आवश्यक रुख कटान आदेश दुई वर्षपछि प्राप्त भएको छ । कटान आदेश पाएसँगै वन क्षेत्रमा रोकिएको निर्माणकार्यले गति लिएको आयोजना पक्षले जनाएको छ ।
मालिका गाउँपालिका–७ डाडाखेतदेखि रघुगङ्गा गाउँपालिका–३ अम्बाङसम्म फैलिएको २५ किलोमिटर लामो प्रसारण लाइनका लागि सामुदायिक र राष्ट्रिय वन क्षेत्र प्रयोग गर्न मन्त्रिपरिषद्ले २०८० फागुन ६ गते स्वीकृति दिएको थियो । तर, डिभिजन वन कार्यालयबाट कटान आदेश भने गत शुक्रबार मात्रै जारी गरिएको हो ।
आयोजना प्रमुख रोशन अग्रवालका अनुसार कटान आदेश नपाउँदा वन क्षेत्रमा तार तान्ने काम रोकिएको थियो । अब निर्माणकार्यलाई तीव्र बनाएर तीन महिनाभित्र आयोजना सम्पन्न गर्ने लक्ष्य राखिएको उनले बताए ।
आयोजनाअन्तर्गत ८२ वटा टावरमध्ये ४० वटा वन क्षेत्रमा र ४२ वटा व्यक्तिगत जग्गामा निर्माण भइरहेका छन् । निर्माणस्थलमा तीन हजार ९३६ वटा रुख रहेको जनाइएको छ । वन क्षेत्र प्रयोग गरेबापत आयोजनाले २०८१ असोजमै ५०४ रोपनी जग्गा खरिद गरी बिरुवा रोपणका लागि पहिलो किस्ताको रकमसमेत उपलब्ध गराइसकेको थियो ।
डिभिजन वन कार्यालय म्याग्दीका प्रमुख वसन्तकेशव अधिकारीले स्वीकृत रुख पहिचानका लागि स्थलगत अनुगमन गर्नुपरेकाले कटान आदेश दिन ढिलाइ भएको बताए ।
म्याग्दी र राहुघाट क्षेत्रमा निर्माणाधीन जलविद्युत् आयोजनाबाट उत्पादन हुने विद्युत् केन्द्रीय प्रणालीमा जोड्न उक्त प्रसारण लाइन निर्माण भइरहेको हो । आयोजनाको हालसम्म ८० प्रतिशत भौतिक प्रगति भएको जनाइएको छ ।
प्रसारण लाइन र सबस्टेशन निर्माणका लागि सन् २०२१ डिसेम्बर ३१ मा लार्सन एन्ड टुब्रो लिमिटेडसँग तीन अर्ब ५७ करोड रुपैयाँमा ठेक्का सम्झौता गरिएको थियो । विभिन्न कारणले निर्माण अवधि पटक–पटक थप गरिएको आयोजना कार्यालयले जनाएको छ ।
आयोजना प्रमुख अग्रवालका अनुसार वन क्षेत्रको कटान आदेश ढिलाइ, राहुघाट सबस्टेशन क्षेत्रको कमजोर भूगोल, विपद्को जोखिम तथा केही स्थानमा स्थानीय विवादका कारण निर्माणमा ढिलाइ भएको हो ।
हालसम्म ८२ मध्ये ७१ वटा टावर खडा भइसकेका छन् । डाडाखेत सबस्टेशनमा ९५ प्रतिशत, प्रसारण लाइनमा ७० प्रतिशत र राहुघाट सबस्टेशनमा ६५ प्रतिशत प्रगति भएको छ ।
कुल चार अर्ब ८८ करोड रुपैयाँ लागत अनुमान गरिएको आयोजनामा नेपाल विद्युत् प्राधिकरणको एक अर्ब पाँच करोड र एसियाली विकास बैंकको तीन अर्ब ८२ करोड रुपैयाँ ऋण लगानी रहेको छ ।
प्रतिक्रिया दिनुहोस्