बाजुरा। बाजुराको हिमाली गाउँपालिका–३ लाम्पाटामा भएको सीमा विवाद र प्रहरी चौकी निर्माणलाई लिएर उत्पन्न तनावपछि अवरुद्ध गरिएको कर्णाली करिडोर राजमार्ग सुचारु गर्ने सहमति भएको छ । हिमाली युवा क्लब, हिमाली गाउँपालिकाका राजनीतिक दल, जिल्ला प्रशासन कार्यालय, जिल्ला प्रहरी कार्यालय र सशस्त्र प्रहरी बलबीच भएको छलफलपछि आन्दोलन स्थगित गर्दै सडक सञ्चालन गर्ने सहमति गरिएको हो ।
सहमतिअनुसार लाम्पाटामा भएको घटनाको स्थलगत अनुगमन गरी मुचल्का तयार गरिनेछ भने हुम्लाको खार्पुनाथ गाउँपालिका–२ र ३ का संलग्न व्यक्तिलाई कानुनी दायरामा ल्याइने जनाइएको छ । स्थानीयवासी र पर्यटकबाट लुटिएका व्यक्तिगत तथा सार्वजनिक सम्पत्तिको क्षतिपूर्ति उपलब्ध गराउने विषयमा पनि सहमति भएको छ ।
त्यसैगरी, विवादका क्रममा कुटपिटबाट घाइते भएका स्थानीयको उपचार खर्च पीडक पक्षले व्यहोर्ने र पूर्ण क्षतिपूर्ति उपलब्ध गराउने निर्णय गरिएको छ । लाम्पाटा र च्याचौर क्षेत्रका विस्थापित परिवारलाई सुरक्षित स्थानमा स्थानान्तरण गरी सुरक्षाको प्रत्याभूति दिलाउने सहमति पनि भएको छ ।
निर्माणाधीन प्रहरी चौकी भवनका नष्ट भएका सामग्रीको क्षतिपूर्ति असुल गरेर निर्माण कार्य तत्काल अघि बढाउने विषयमा समेत त्रिपक्षीय सहमति भएको जनाइएको छ । सहमतिमा उल्लेख गरिएका विषयको कानुनी प्रक्रिया अघि बढाउँदै २४ घण्टाभित्र यातायात सञ्चालन गर्ने र निर्धारित समयभित्र प्रक्रिया अघि नबढे पुनः अनिश्चितकालीन आन्दोलन गर्ने चेतावनी पनि दिइएको छ ।
लाम्पाटामा भएको झडपमा छ जना घाइते भएका थिए । त्यसपछि हुम्ला जाने सम्पूर्ण सवारीसाधन सञ्चालन रोकिएको थियो । झडपमा हिमाली गाउँपालिका–३ का पेमा गारा गुरुङ, लक्ष्मी गुरुङ, मिन कुँवर र नरबहादुर गुरुङ, प्रहरी चौकी बिच्छ्यामा कार्यरत प्रहरी सहायक हवल्दार महेश धामी तथा हिमाली गाउँपालिकाका प्रमुख प्रशासकीय अधिकृत कुलबहादुर थापा घाइते भएका थिए । घाइतेमध्ये चार जनाको काठमाडौंमा उपचार भइरहेको छ ।
‘हाम्रो सुदूरपश्चिम हामी चिनाउँछौँ’ अभियानअन्तर्गत मेयर गोपाल हमालसहितको टोली रानीसैन जाने क्रममा अघिल्लो दिनदेखि नै विवाद उत्पन्न भएपछि उक्त टोलीलाई पनि गन्तव्यतर्फ जान रोक लगाइएको थियो ।
लामो समयदेखि बाजुराको हिमाली गाउँपालिका–३ अन्तर्गत पर्ने लाम्पाटा र च्याचौर क्षेत्रलाई हुम्लावासीले आफ्नो जिल्लाभित्र पर्ने दाबी गर्दै आएका छन् । यही विषयलाई लिएर पटक–पटक विवाद हुँदै आएको छ ।
प्रतिक्रिया दिनुहोस्