काठमाडौं । प्रधानमन्त्री बालेन्द्र शाह (बालेन) ले नेपाली भूमि लिम्पियाधुरा, कालापानी र लिपुलेकको विवाद छिमेकी मुलुकहरूसँगको वार्ता र कूटनीतिक संवाद (टेबल टक) मार्फत समाधान गरिने स्पष्ट पारेका छन् ।
आइतबार बसेको प्रतिनिधिसभा बैठकमा आज नेपालको सार्वभौमिकता र भौगोलिक अखण्डतासँग जोडिएको यस विषयमा सरकार पूर्ण रूपमा गम्भीर रहेको उनले बताए । बैठकमा नेकपा (एमाले) संसदीय दलकी उपनेता एवं सांसद पद्मा अर्यालले नेपाली भूमि हुँदै भारत र चीनले व्यापारिक मार्ग निर्माण गरिरहेको विषय उठाउँदै सरकारको ठोस पहल र धारणा माग गरेकी थिइन् ।
सांसद अर्यालको प्रश्नको जवाफ दिँदै प्रधानमन्त्री शाहले भने, ‘यससम्बन्धी नेपाल सरकारले अफिसियल रूपमा कूटनीतिक नोट (डिप्लोमेटिक नोट) भारत सरकारलाई पठाइसकेको छ र त्यसको जवाफ पनि आइसकेको छ। उक्त जवाफमा दुवै सरकारले आफ्नो इतिहास र सर्वेयरहरू राखेर, भूमिसम्बन्धी जानकारी भएका व्यक्तिहरूबीच टेबल टक मार्फत यो कुरा समाधान गर्ने सहमति भएको छ।’
प्रधानमन्त्री शाहले यस सीमा विवादको समाधानका लागि भारत र चीनसँग मात्र नभई बेलायत (इङ्ल्यान्ड) सरकारसँग पनि संवाद अगाडि बढाइएको जानकारी दिए । ब्रिटिस इन्डियाले उपमहाद्वीप छोड्दाको समयका ऐतिहासिक दस्तावेज र तथ्यहरूका कारण यस विषयमा बेलायतको पनि सरोकार रहनुपर्ने नेपालको मान्यता रहेको उनको भनाइ थियो। ‘यससम्बन्धी भारत र चाइनालाई मात्रै नभएर इंग्ल्यान्ड सरकारसँग पनि कुरा गरेका छौँ । उहाँहरूले ब्रिटिस इन्डिया छोड्दै गर्दाको हाम्रोमा भइरहेको हुँदा यसमा इंग्ल्यान्डले पनि सरोकार राख्नुपर्छ भन्ने हाम्रो मान्यता हो । यो सबै कुराहरू टेबलटक, डिप्लोमेटिक हिसाबले भएर समाधान हुने जानकारी गराउन चाहन्छु ।’
प्रधानमन्त्रीले नेपालको भूमि प्रयोग गरेर भइरहेका गतिविधिप्रति सरकार सजग रहेको र कूटनीतिक च्यानल प्रयोग गरेर नै यसको स्थायी समाधान खोजिनेमा जोड दिए ।
प्रतिक्रिया दिनुहोस्