काठमाडौं। नेपालका लागि आधिकारिक बिक्रेता एमएडब्लू वृद्धि मोटर्सले नाडा अटो शो २०२६ मा चिनियाँ ब्रान्ड डोङफेङको प्रिमियम विद्युतीय एसयूभी ‘एमहिरो–१’ शोकेस गरेको छ।
शक्तिशाली मोटर, अफरोड क्षमता र विलासी डिजाइनलाई मुख्य विशेषताका रूपमा प्रस्तुत गरिएको एमहिरो–१ लाई इलेक्ट्रिक हमर र मर्सिडिज–बेन्ज जी–क्लाससँग प्रतिस्पर्धा गर्ने मोडलका रूपमा अघि सारिएको छ । एमहिरो–१ मा चारवटा विद्युतीय मोटर जडान गरिएको छ । यी मोटरले संयुक्त रूपमा ८०० किलोवाट अर्थात् १ हजार ८८ एचपी पावर र १ हजार ४०० न्यूटन मिटर पीक टर्क उत्पादन गर्ने कम्पनीको दाबी छ । करिब ३.५ टन तौल रहेको यो एसयूभीले शून्यदेखि १०० किलोमिटर प्रतिघण्टाको गति ४.२ सेकेन्डमै पूरा गर्ने जनाइएको छ ।
गाडीमा ६५.८ किलोवाट आवर क्षमताको ब्याट्री प्रयोग गरिएको छ । डब्लूएलटीपी परीक्षणअनुसार पूर्ण चार्जमा यसले ४५० किलोमिटरसम्म यात्रा गर्न सक्ने कम्पनीको दाबी छ। एमहिरो–१ रेन्ज एक्सटेन्डेड प्रविधिमा आधारित भएकाले यसमा ८० लिटरको इन्धन ट्यांकसमेत राखिएको छ ।अफरोड क्षमताका लागि एमहिरो–१ मा एयर सस्पेन्सन दिइएको छ । यसको सामान्य ग्राउन्ड क्लियरेन्स २४० मिलिमिटर रहेकोमा आवश्यकता अनुसार यसलाई ३३० मिलिमिटरसम्म बढाउन सकिन्छ । कम्पनीका अनुसार गाडीले ९०० मिलिमिटरसम्म गहिरो पानी पार गर्न सक्छ ।
त्यस्तै, कठिन भूभागमा सहज ड्राइभिङका लागि बालुवा, चट्टान, हिलो र पानीका लागि छुट्टाछुट्टै अफरोड ड्राइभिङ मोड उपलब्ध छन् । यसले एमहिरो–१ लाई सामान्य सडकसँगै कठिन भूभागमा समेत लक्षित प्रिमियम एसयूभीका रूपमा प्रस्तुत गरेको छ । डिजाइनतर्फ एमहिरो–१ मा ठूलो सेन्ट्रल डिस्प्ले, डिजिटल इन्स्ट्रुमेन्ट क्लस्टर तथा गोलाकार थ्री–स्पोक स्टेयरिङ ह्वील दिइएको छ। ढोकाको ह्यान्डलसमेत पेस्तोलबाट प्रेरित डिजाइनमा तयार गरिएको कम्पनीले जनाएको छ ।
एमएडब्लू वृद्धिले हाल एमहिरो–१ लाई नाडा अटो शोमा प्रदर्शनी तथा शोकेसका लागि मात्र राखेको हो । यसको बिक्री तत्काल सुरु हुने छैन। कम्पनीले सन् २०२७ जनवरीदेखि नेपाली बजारमा यसको बिक्री सुरु गर्ने तयारी गरेको जनाएको छ।
प्रतिक्रिया दिनुहोस्