काठमाडौं । प्रधानमन्त्री केपी शर्मा ओलीले धरानबासीलाई खानेपानी उपललब्ध गराउने प्रक्रिया अघि बढेको बताएका छन् ।
प्रधानमन्त्री तथा मन्त्रिपरिषद्को कार्यालय, सिंहदरबारमा आज सुनसरीको धरान उपमहानरपालिकाका प्रमुख हर्कराज राईसहितको प्रतिनिधिमण्डलले प्रधानमन्त्रीसँग भेट गरेका छन् । उक्त भेटमा प्रधानमन्त्री ओलीले उपमहानरपालिकाका प्रमुख राईलाई धरानका नागरिकलाई खानेपानीको प्रबन्ध गर्न संघीय सरकारले बजेट उपलब्ध गराएर आवश्यक सहजीकरण गर्ने बताए । “धरानबासीले खानेपानी पिउन पाउनुपर्छ ।
यो प्रक्रिया आजैबाट अघि बढ्यो । यसका लागि सङ्घीय सरकारले बजेटको प्रबन्धलगायत अन्य विषयमा आवश्यक सहजीकरण गर्नेछ । यो सन्देश धरानबासीलाई सुनाइदिनुहोला,” प्रधानमन्त्री ओलीले भने ।
उक्त खानेपानी आयोजनाका लागि विस्तृत परियोजना प्रतिवेदन यसअघि सङ्घीय सरकारले तयार गरिसकेको छ । धरानका प्रतिनिधिसँगको भेटमा प्रधानमन्त्री ओलीले धरानको फोहोर व्यवस्थापनका लागि परम्परागत नभई आधुनिक प्रविधियुक्त ल्याण्डफिल्डसाइट बनाउनुपर्नेमा जोड दिएको प्रधानमन्त्रीको सचिवालयले जनाएको छ ।
प्रतिक्रिया दिनुहोस्