कर्पोरेट समाचार 
वीरगञ्ज (पर्सा) । वीरगञ्ज महानगरले लक्ष्यअनुसार राजस्व सङ्कलन नभएपछि घरदैलो अभियान थालेको छ । चालु आर्थिक वर्षमा ७२ करोड रुपैयाँ राजस्व सङ्कलन गर्ने लक्ष्य राखेको महानगरले ३७ करोड ३३ लाख मात्र राजस्व संकलन भएपछि अभियान नै सञ्चालन गरी राजस्व संकलन गर्न लागेको हो ।
वीरगञ्ज महानगरका प्रमुख राजेशमान सिंह, उपप्रमुख इम्तियाज आलम, प्रमुख प्रशासकीय अधिकृत अरविन्दलाल कर्ण र राजस्व महाशाखा प्रमुख मनोज कर्णलगायत पदाधिकारी सम्मिलित टोलीले गत आइतबारदेखि यहाँका व्यवसायीले व्यवसाय कर, घरबहाल कर र सम्पत्ति कर तिर्न आनाकानी गरेकाले अभियान थालिएको जनाइएको छ ।
राजस्व महाशाखा प्रमुख कर्णले महानगरभित्र सञ्चालनमा रहेका ८० प्रतिशतभन्दा धेरै पसलेले कर नतिरेको भेटिएको भन्दै घरदैलो अभियानद्वारा राजस्व संकलन गर्न थालिएको जानकारी दिए ।
कर्णले भने, ‘‘दैनिक १३० वटा पसलको अनुगमन गरिरहेका छौँ । औसतमा ८० प्रतिशतभन्दा धेरै पसलले कर नतिरेको भेटिएको छ । हामीले सातदिने सूचना दिएर कर तिर्न आह्वान गरेका छौँ ।’ महानगरको टोली अनुगमनमा आएपछि मीनाबजार, घण्टाघर चोक, लिङ्करोडलगायत स्थानका व्यापारी तथा व्यवसायी सटर बन्द गरेर भागेका थिए ।
प्रतिक्रिया दिनुहोस्