सुनचाँदीका गहनामा लगाइएको विलासिता कर खारेजीको माग गर्दै व्यवसायीहरु प्रर्दशनमा

काठमाडौं । सुनचाँदीका गहनामा लगाइएको २ प्रतिशत विलासिता कर खारेज गर्न माग गर्दै सुनचाँदी व्यवसायीहरुले प्रदर्शन गरेका छन् । सुनचाँदीमा सरकारले लगाएको करका विरुद्ध सुनचाँदी व्यवसायी तथा कालिगढ संघर्ष समितिको अगुवाइ व्यवसायीहरुले आज न्युरोड गेटदेखि इन्द्रचोक डबलीसम्म र्यालीसहित आन्दोलन गरेका हुन् ।

कानुले सुनलाई नगदसरहको सम्पत्तिको मान्यता दिएकाले सरकारद्वारा सुनमा लगाइएको २ प्रतिशत विलासी शुल्क खारेज हुनुपर्ने संघर्ष समितिको माग छ । उनिहरुले हिरा, जवहरातमा लगाइएको १३ प्रतिशत मूल्य अभिवृद्धि कर खारेज गरेर पहिलेकै व्यवस्था कायम गरिनुपर्ने, सानो परिमाणमा ५० ग्राम र १०० ग्रामका सुनका टुक्राहरू खुल्ला रूपमा स्थायी लेखा नम्बर र कर चुक्ता प्रमाणपत्रको आधारमा व्यवसायीले खरिद गर्ने व्यवस्था मिलाइनुपर्ने लगायतका विभिन्न मग राखेका छन् ।

सरकारले अगामी आर्थिक वर्षको बजेटमार्फत सुनचाँदीका गहनामा दुई प्रतिशत विलासिता कर लाग्ने घोषणा गरेको थियो । विगतमा १० लाखभन्दा माथिका सुनका गहनामा मात्रै विलासिता शुल्क लाग्ने व्यवस्था थियो । तर, अब जुनसुकै मूल्यका सुन वा सुनका गहनामा विलासिता शुल्क मा २ प्रतिशतको विलासिता शुल्क तिर्नुपर्ने हुन्छ । यसले सुन वा सुनका गहनामा कम्तीमा ६ प्रतिशतको विलासिता शुल्क तिर्नुपर्ने अवस्था सिर्जना गरेको भन्दै व्यवसायीहरु रुष्ट बनेका छन् ।

 

प्रतिक्रिया दिनुहोस्