सुनको मूल्य तोलामा तीन लाख रुपैयाँ नाघ्यो, चाँदी पनि उच्च विन्दुमा

काठमाडौं । स्थानीय बजारमा आज सुनको मूल्यले तीन लाख रुपैयाँ पार गर्दै ऐतिहासिक रेकर्ड बनाएको छ । बुधबार मात्र सुनको मूल्य इतिहासकै उच्च दरमा कारोबार भएको थियो। सो दिन सुनको भाउ प्रतितोला दुई लाख ९५ हजार एक सय रूपैयाँ निर्धारण भएकोमा बिहीबार सुन रेकर्ड मूल्यबाट केही सस्तिएको थियो ।

बिहीबार दुई हजार नौ सय रूपैयाँले घटेर दुई लाख ९२ हजार दुई सय रूपैयाँमा कारोबार भएको सुन आज एकैदिन प्रतितोला नौ हजार दुई सय रुपैयाँले महँगिएर नयाँ कीर्तिमान कायम भएको छ । नेपाल सुनचाँदी व्यवसायी महासङ्घका अनुसार उपभोक्ताले आज एक तोला सुन खरिद गर्नलाई तीन लाख एक हजार चार सय रुपैयाँ तिर्नुपर्ने हुन्छ । शुक्रबारका लागि महासंघले तय गरेको सुनको यो मूल्य हालसम्मकै उच्च हो ।

यसअघि मङ्गलबार एक तोला छापावाल सुनको मूल्य दुई लाख ८४ हजार ७०० त्यति नै चाँदी पाँच हजार ८८० रुपैयाँमा किनबेच भएको थियो । गत आइतबार एक तोला सुन दुई लाख ७८ हजार ८०० र त्यति नै परिमाणको चाँदी पाँच हजार ६२५ रुपैयाँमा कारोबार भएको थियो । सोमबार एक तोला सुन दुई लाख ८२ हजार र त्यति नै परिमाणको सेतो धातु पाँच हजार ८१० रुपैयाँमा खरिदबिक्री भएको थियो ।

यस्तै आज चाँदीकोमूल्य पनि पनि हालसम्मकै उच्च विन्दुमा पुगेको छ। बिहीबार तोलामा पाँच हजार आठ सय ७० रूपैयाँमा कारोबार भएको चाँदी आज ६ हजार एक सय ९० रूपैयाँमा कारोबार भइरहेको छ।

आज अन्तरराष्ट्रिय बजारमा एक औँस सुन चार हजार ९६० र त्यति नै परिमाणको सेतो धातु ९८ अमेरिकी डलरमा कारोबार भइरहेको छ ।

 

 

प्रतिक्रिया दिनुहोस्