‘उद्योगी व्यवसायीहरूको विवरणको सुरक्षाप्रति संवेदनशील छौं’

काठमाडौं । दर्ता नभएका तर सञ्चालनमा रहेका व्यवसायलाई गणनाको दायरामा ल्याई अर्थतन्त्रको वास्तविक आकार पत्ता लगाउनुपर्नेमा सरोकारवालाले जोड दिएका छन् ।

विज्ञापन

काठमाडौंमा आज आयोजित राष्ट्रिय आर्थिक गणना, २०८२ को अन्तरक्रिया कार्यक्रममा सहभागीहरुले अनौपचारिक अर्थतन्त्र अर्थात् दर्ता नभई सञ्चालनमा आएका व्यवसायहरुका कारण अर्थतन्त्रको वास्तविक आकार थाहा नभएको धारणा राखेका हुन् । राष्ट्रिय तथ्याङ्क कार्यालयले आर्थिक गणनाका क्रममा उद्योगी व्यवसायीहरूको विवरणको सुरक्षाप्रति संवेदनशील रहेको उल्लेख गर्दै गणनामा सहयोग गर्न निजी क्षेत्रलाई आग्रह गरेको छ ।

राष्ट्रिय तथ्याङ्क कार्यालय र नेपाल उद्योग परिसंघको संयुक्त आयोजनामा सम्पन्न कार्यक्रममा नेपाल उद्योग परिसंघका महानिर्देशक डा. घनश्याम ओझाले निजी क्षेत्रको तथ्याङ्क संकलनमा परिसंघले नेतृत्वदायी भूमिका खेल्ने बताए । उनले भने, ‘हामी सबै यस प्रक्रियामा जोडिनु पर्छ। सही तथ्याङ्क आए मात्र उद्योगी र सरकार दुवैलाई योजना बनाउन सहज हुन्छ।’

यस्तै, उनले परिसंघका २९ वटा संस्थागत सदस्य र ५०० भन्दा बढी आबद्ध सदस्यहरू मार्फत जनचेतना फैलाउन सकिने समेत जानकारी दिए । कार्यक्रममा तथ्याङ्क कार्यालय र परिसंघबीच छिट्टै समझदारी बनाएर रिसर्च र तथ्याङ्क विश्लेषणमा सहकार्य गर्नेबारे छलफल भएको छ। यसैगरी नेपाल उद्योग परिसंघको अध्यक्ष वीरेनद्रराव पाण्डेले तथ्यमा आधारित योजनाका लागि आफूहरू सहकार्य गर्न तयार रहेको बताए । निजी क्षेत्रको तथ्याङ्क संकलन र गणनालाई प्रभावकारी बनाउन मद्दत गर्ने उनको भनाइ छ ।

अध्यक्ष पाण्डेले आधिकारिक तथ्याङ्क बैंकको निर्माणले आगामी दिनमा उद्योगीहरूलाई आफ्ना रणनीतिक योजना बनाउन समेत ठूलो सहयोग पुग्ने उल्लेख गरे । उनले परिसंघले आफ्ना सदस्यहरूलाई गणनामा सही विवरण उपलब्ध गराउन प्रोत्साहन गर्ने प्रतिबद्धता पनि व्यक्त गरे ।

कार्यक्रममा तथ्याङ्क कार्यालयका उप–प्रमुख ढुण्डीराज लामिछानेले २०८२ को मूल नारा ‘अर्थतन्त मापनको लागि आर्थिक गणना’ रहेको जानकारी गराए । उनले आर्थिक गणनामा निजी क्षेत्रको आशंका निवारण गर्दै तथ्याङ्क ऐन, २०७९ अनुसार तथ्याङ्कको पूर्ण गोपनीयता कायम गरिने बताए । ‘हामी उद्योगी व्यवसायीहरूको विवरणको सुरक्षाप्रति संवेदनशील छौं। यो गणना कसैलाई करको दायरामा ल्याउन वा दण्डित गर्न नभई मुलुकको वास्तविक आर्थिक सूचकहरू तयार गरी अनुसन्धान र नीति निर्माणमा प्रयोग गर्नका लागि हो’ लामिछानेले भने,‘निजी क्षेत्रको सहभागिता बिना यो अभियान सफल हुन सक्दैन, त्यसैले हामी परिसंघ जस्ता संगठित संस्थाहरूसँग घनिभूत सहकार्य गर्न चाहन्छौं।’