एजेन्सी । इरानले सन् २०२६ फिफा विश्वकपका क्रममा अमेरिकाले लागू गरेको यात्रा व्यवस्थाले आफ्नो राष्ट्रिय फुटबल टोलीको तयारी र प्रदर्शनमा प्रतिकूल असर परेको आरोप लगाएको छ।
अन्तर्राष्ट्रिय सञ्चारमाध्यमका अनुसार अमेरिकी नियमअनुसार इरानी टोली खेल सुरु हुनुभन्दा २४ घण्टाअघि मात्रै अमेरिका प्रवेश गर्न पाउने र खेल सकिएलगत्तै देश छोड्नुपर्ने व्यवस्था गरिएको इरानी अधिकारीहरूको दाबी छ।
इरानले यस्तो व्यवस्थालाई राजनीतिक पूर्वाग्रहयुक्त हस्तक्षेपको संज्ञा दिँदै विश्वकपमा आफ्नो टोली सबैभन्दा बढी प्रभावित बनेको दाबी गरेको छ। प्रतियोगिताअघि अमेरिकी प्रशासनले इरानी खेलाडीलाई भिसा उपलब्ध गराए पनि केही सहयोगी कर्मचारीलाई प्रवेश अनुमति नदिएको इरानी पक्षको आरोप छ। त्यसपछि टोलीले अमेरिकाको एरिजोनामा राख्ने भनिएको आधार शिविर परिवर्तन गरी मेक्सिकोको टिजुआनामा सारेको बताइएको छ। अहिले टोली खेल हुने दिन मात्रै अमेरिका प्रवेश गर्ने गरेको जनाइएको छ।
इरानी समर्थकहरूले खेलमा राजनीति हावी भएको आरोप लगाएका छन्। तेहरानका एक स्थानीय आर्टिनले चाइना ग्लोबल टेलिभिजन नेटवर्क (CGTN) सँगको अन्तर्वार्तामा राजनीति र फुटबललाई अलग राख्नुपर्ने धारणा व्यक्त गरेका छन्। इरान फुटबल महासंघले पनि विश्वकप आयोजकमाथि आफ्नो प्रतिनिधिमण्डलमाथि अन्यायपूर्ण यात्रा प्रतिबन्ध लगाएको आरोप दोहोर्याएको छ। इरानका पूर्व राष्ट्रिय गोलरक्षक तथा अर्थशास्त्री होसेन राघफारले यस्ता कदम अन्तर्राष्ट्रिय खेलकुदका आधारभूत सिद्धान्तविपरीत भएको दाबी गरेका छन्।
सन् २०२६ को फिफा विश्वकप जुन ११ देखि जुलाई १९ सम्म संयुक्त राज्य अमेरिका, क्यानडा र मेक्सिकोमा संयुक्त रूपमा आयोजना भइरहेको छ। प्रतियोगितामा यसपटक ४८ राष्ट्र सहभागी छन्।
प्रतिक्रिया दिनुहोस्