एजेन्सी । भेनेजुएलामा बुधबार आएका दुई शक्तिशाली भूकम्पमा ज्यान गुमाउनेको संख्या १,४३० पुगेको छ। भूकम्पमा ३,२३८ जना घाइते भएका छन् भने ३,१४२ परिवार प्रत्यक्ष रूपमा प्रभावित भएका छन्।
राष्ट्रिय सभाका अध्यक्ष होर्खे रोड्रिगेजका अनुसार ७.२ र ७.५ म्याग्निच्युडका दुई भूकम्प केही सेकेन्डको अन्तरमा आएपछि हालसम्म देशभर ४३० वटा हल्कादेखि मध्यम स्तरका पराकम्प रेकर्ड भएका छन्।
उनले सरकारले ज्यान गुमाएकाप्रति गहिरो समवेदना व्यक्त गर्दै दशौं हजार उद्धारकर्मी अझै खोज तथा उद्धार कार्यमा परिचालित रहेको बताएका हुन् ।
सबैभन्दा बढी प्रभावित ला ग्वाइरा राज्यमा ७२ लाख किलोग्राम खाद्यान्न वितरण गरिएको छ। साथै ५,००० भन्दा बढी घाइतेको अस्पतालमा उपचार गरिएको र कुल स्वास्थ्य सेवा १२,००० पटकभन्दा बढी प्रदान गरिएको जानकारी उनले दिए।
सरकारका अनुसार ला ग्वाइरामा ६० प्रतिशत विद्युत् सेवा पुनःस्थापित भइसकेको छ भने केही क्षेत्रमा खानेपानी आपूर्तिमा पनि सुधार आएको छ। सडक खुलाउने र उद्धार कार्यलाई तीव्र बनाउन १०० भन्दा बढी हेभी मेसिन परिचालन गरिएको छ।
हालसम्म २,२४२ अन्तर्राष्ट्रिय उद्धारकर्मी, ९६ वटा खोज तथा उद्धारका लागि तालिमप्राप्त कुकुर, १०३ टन उद्धार सामग्री तथा तीन टन औषधि भेनेजुएला पुगिसकेको छ।
सञ्चारमाध्यमका अनुसार राजधानी काराकास नजिक रहेको सिमोन बोलिभार अन्तर्राष्ट्रिय विमानस्थलले शनिबारदेखि आंशिक रूपमा सञ्चालन पुनः सुरु गरेको छ। विमानस्थलमार्फत मानवीय सहायता बोकेका कार्गो उडान सञ्चालन भइरहेका छन्। (सीसीटीभीप्लस)
प्रतिक्रिया दिनुहोस्