काठमाडौं। चेरीले नेपाली बजारमा आफ्नो नयाँ विद्युतीय अर्बन क्रसओभर ‘चेरी क्यु’ सार्वजनिक गर्ने तयारी गरेको छ।
आधुनिक शहरी जीवनशैलीलाई लक्षित गर्दै विकास गरिएको यो गाडी आगामी साउन २७ देखि भदौ १ सम्म काठमाडौंको भृकुटीमण्डपमा आयोजना हुने ‘नाइमा मोबिलिटी एक्स्पो २०२६’ मा पहिलोपटक सार्वजनिक गरिने भएको हो।
उन्नत विद्युतीय प्लेटफर्ममा आधारित चेरी क्युमा आकर्षक बाह्य डिजाइनसँगै फराकिलो तथा व्यावहारिक भित्री संरचना रहेको कम्पनीले जनाएको छ। गाडीमा ३७५ लिटर क्षमताको सामान राख्ने स्थान उपलब्ध छ, जसलाई पछाडिका सिट फोल्ड गरेपछि १,४५० लिटरसम्म विस्तार गर्न सकिन्छ।
चेरी क्युमा ९० किलोवाट क्षमताको स्थायी चुम्बकीय विद्युतीय मोटर र ४१.२ किलोवाट–घण्टा क्षमताको लिथियम–फलाम–फस्फेट ब्याट्री जडान गरिएको छ। पछाडिका पाङ्ग्राबाट चल्ने प्रणाली रहेको यो गाडीले एनईडीसी मापदण्डअनुसार करिब ४०० किलोमिटरसम्म यात्रा गर्न सक्ने कम्पनीको दाबी छ।
चार्जिङका हिसाबले पनि यो गाडी प्रभावकारी रहेको कम्पनीले जनाएको छ। ८५ किलोवाट क्षमताको द्रुत प्रत्यक्ष धारा चार्जिङ सुविधामार्फत ब्याट्रीलाई ३० प्रतिशतबाट ८० प्रतिशतसम्म केवल १६ मिनेटमै चार्ज गर्न सकिनेछ। साथै, ‘भेहिकल–टु–लोड’ सुविधाका कारण गाडीबाट बाह्य विद्युतीय उपकरण सञ्चालन गर्न पनि सकिने व्यवस्था गरिएको छ।
नेपाली बजारमा चेरी क्यु तीन भेरियन्ट, पाँच आकर्षक बाहिरी रङ तथा दुई प्रिमियम भित्री रङ संयोजनमा उपलब्ध हुने कम्पनीले जनाएको छ। आधुनिक प्रविधि, सहज प्रयोग र उत्कृष्ट कार्यसम्पादनको संयोजनका साथ नेपाली विद्युतीय सवारी बजारमा नयाँ विकल्पका रूपमा यो गाडी आउने कम्पनीको विश्वास छ।
चेरी क्युको आधिकारिक सार्वजनिक प्रदर्शनसँगै मूल्य घोषणा पनि नाइमा मोबिलिटी एक्स्पो २०२६ मै गरिने कम्पनीले जनाएको छ।
प्रतिक्रिया दिनुहोस्