जनकपुरधाम । जिल्ला प्रशासन कार्यालय सिरहाले सेवाग्राहीको बढ्दो चापलाई मध्यनजर गर्दै सार्वजनिक बिदाका दिन पनि राष्ट्रिय परिचयपत्रसम्बन्धी सेवा सञ्चालन गर्ने भएको छ।
कार्यालयले सूचना जारी गर्दै साउन ७ गतेदेखि अर्को सूचना जारी नभएसम्म प्रत्येक शनिबार र आइतबार पनि राष्ट्रिय परिचयपत्रसम्बन्धी सेवा उपलब्ध गराइने जनाएको हो।
सहायक प्रमुख जिल्ला अधिकारी चेतराज बरालद्वारा जारी सूचनाअनुसार राष्ट्रिय परिचयपत्र बनाउन आउने सेवाग्राहीको सङ्ख्या दैनिक बढ्दै गएकाले सार्वजनिक बिदाका दिन बिहान १० बजेदेखि सेवा सञ्चालन गरिनेछ।
कार्यालयले सेवाग्राहीलाई तोकिएका आवश्यक कागजातसहित उपस्थित भई सेवाको लाभ लिन आग्रह गरेको छ।
प्रतिक्रिया दिनुहोस्