काठमाडौं । एमभी दुगड ग्रुपले भारतीय विद्युतीय मोटरसाइकल ब्रान्ड रिभोल्टको नयाँ विद्युतीय मोटरसाइकल ‘अल–न्यू आरभीएक्स’ नेपालमा सार्वजनिक गरेको छ।
काठमाडौंमा जारी नाडा अटो शो २०२६ मा मंगलबार सार्वजनिक गरिएको आरभीएक्स रिभोल्टको हालसम्म उत्पादन गरेको सबैभन्दा शक्तिशाली विद्युतीय बाइक भएको कम्पनीले जनाएको छ।
नयाँ पुस्ताका राइडरलाई लक्षित गरिएको आरभीएक्सको सुरुवाती मूल्य ३ लाख ९९ हजार रुपैयाँ तोकिएको छ। नाडा अटो शोमा रहेको रिभोल्टको प्याभिलियन तथा काठमाडौंको पानीपोखरीस्थित रिभोल्टको मुख्य शोरुमबाट यसको बुकिङ र परीक्षण सवारी सुरु गरिएको कम्पनीले जनाएको छ।
आरभीएक्समा ४ किलोवाटको मिड–ड्राइभ पीएमएसएम मोटर जडान गरिएको छ। यसले अधिकतम ५.३ किलोवाट शक्ति तथा पछाडिको पांग्रामा अधिकतम २३० न्यूटन मिटर टर्क उत्पादन गर्छ। कम्पनीका अनुसार बाइकले ३.९ सेकेन्डमा शून्यदेखि ४० किलोमिटर प्रतिघण्टाको गति लिन सक्छ भने नयाँ बुस्ट मोड प्रयोग गर्दा अधिकतम ९० किलोमिटर प्रतिघण्टाको गति प्राप्त गर्न सकिन्छ।
बाइकमा ३.२४ किलोवाट घण्टाको निकाल्न मिल्ने एनएमसी ब्याट्री प्रयोग गरिएको छ। एकपटक पूर्ण चार्ज गर्दा यसले १६० किलोमिटरको आईडीसी रेन्ज दिने कम्पनीको दाबी छ। द्रुत चार्जरको प्रयोगबाट ब्याट्रीलाई ८० मिनेटमा शून्यदेखि ८० प्रतिशतसम्म चार्ज गर्न सकिनेछ। निकाल्न मिल्ने ब्याट्री भएकाले घरायसी विद्युत् सकेटबाट पनि ब्याट्री चार्ज गर्न सकिने सुविधा रहेको कम्पनीले जनाएको छ।
आरभीएक्समा बुस्ट, स्पोर्ट्स, सिटी र इको गरी चारवटा सवारी मोड उपलब्ध छन्। विभिन्न सडकमा सहज नियन्त्रणका लागि यसमा अगाडि उल्टो प्रकारको टेलिस्कोपिक सस्पेन्सन तथा पछाडि मोनो–शक सस्पेन्सन राखिएको छ। प्रविधितर्फ आरभीएक्समा ३.५ इन्चको आईपी६७ प्रमाणित पीएमभीए डिस्प्ले, ब्लुटुथ जडान, टेलिमेटिक्स, भौगोलिक स्थान पहिचान तथा हावाबाटै सफ्टवेयर अद्यावधिक गर्ने सुविधा समावेश गरिएको छ। यसका साथै कल तथा सन्देशको सूचना, हिल होल्ड असिस्ट, रिभर्स मोड, पार्क असिस्ट, इम्मोबिलाइजर र सवारी साधन खोज्ने सुविधा पनि उपलब्ध छन्।
आरभीएक्स पल्स ब्ल्याक, इलेक्ट्रिक ब्लु र एक्लिप्स रेड गरी तीन रङमा उपलब्ध हुनेछ।आरभीएक्स सार्वजनिक गर्दै एमभी दुगड ग्रुपका अध्यक्ष मोतीलाल दुगडले नेपालमा ररभोल्टले सुरुदेखि नै उत्साहजनक प्रतिक्रिया पाएको बताए। उनले नेपाली राइडरका लागि विद्युतीय गतिशीलताको उत्कृष्ट प्रविधि ल्याउने प्रतिबद्धताको परिणाम आरभीएक्स भएको उल्लेख गरे।
उनका अनुसार इन्धनको बढ्दो मूल्य र वातावरणीय चेतनाबीच आरभीएक्सले कार्यक्षमता र शैलीमा सम्झौता नगरी दिगो तथा किफायती विकल्प प्रदान गर्नेछ। रतनइन्डिया इन्टरप्राइजेज लिमिटेडकी अध्यक्ष अञ्जली रतनले नेपाल रिभोल्ट मोटर्सका लागि महत्वपूर्ण रणनीतिक बजार भएको बताइन्। आरभीएक्सले कम्पनीको इन्जिनियरिङ र नवप्रवर्तनलाई प्रतिनिधित्व गर्ने उल्लेख गर्दै उनले नेपालमा उच्च कार्यक्षमताको विद्युतीय बाइकको नयाँ मापदण्ड स्थापित गर्ने विश्वास व्यक्त गरिन्।
‘नेपाल गर्छ रिभोल्ट’ अभियान
आरभीएक्स सार्वजनिकसँगै रिभोल्ट र एमभी दुगड ग्रुपले ‘नेपाल गर्छ रिभोल्ट’ नामक नयाँ ब्रान्ड अभियान पनि सुरु गरेका छन्। यो रिभोल्टको विश्वव्यापी ब्रान्ड अभियानको नेपाली संस्करणका रूपमा प्रस्तुत गरिएको हो। अभियानले आत्मविश्वासी, महत्वाकांक्षी र आफ्नै तरिकाले अघि बढ्न चाहने नेपाली राइडरलाई केन्द्रमा राखेको कम्पनीले जनाएको छ। यसले गतिशीलतालाई आफ्नो पहिचान र सपनाको विस्तारका रूपमा हेर्ने नयाँ पुस्ताका राइडरको भावनालाई प्रतिनिधित्व गर्ने बताइएको छ।
नाडा अटो शो २०२६ का आगन्तुकले रिभोल्टको प्याभिलियनमा आरभीएक्स प्रत्यक्ष अवलोकन गर्नुका साथै परीक्षण सवारी र बाइकको पूर्व–बुकिङ गर्न सक्नेछन्। प्रारम्भिक ग्राहकका लागि विशेष अवसरसमेत उपलब्ध गराइएको कम्पनीले जनाएको छ। आरभीएक्स काठमाडौंस्थित मुख्य शोरुमका साथै वीरगन्ज, जनकपुर, पोखरा, विराटनगर, नेपालगन्ज, बुटवल र धनगढीलगायतका प्रमुख शहरमा रहेका एमभी दुगड ग्रुपका शोरुमबाट उपलब्ध हुनेछ। कम्पनीका अनुसार शोरुममा विद्युतीय सवारीसाधनका लागि तालिमप्राप्त प्राविधिक, समर्पित सेवा पूर्वाधार तथा सक्कली पार्टपुर्जा र सहायक सामग्री उपलब्ध हुनेछन्।
रिभोल्ट मोटर्स सन् २०१७ मा स्थापना भएको भारतीय विद्युतीय सवारीसाधन कम्पनी हो। कम्पनीले विद्युतीय मोटरसाइकलमार्फत वातावरणमैत्री यातायातलाई प्रवर्द्धन गर्दै आएको जनाएको छ। ररभोल्ट मोटर्स रतनइन्डिया इन्टरप्राइजेज लिमिटेडको पूर्ण स्वामित्वमा रहेको सहायक कम्पनी हो।
प्रतिक्रिया दिनुहोस्