काठमाडौं । तपाईंको नागरिकता हराएको छ, च्यातिएको छ वा आगलागी तथा पानीले बिग्रिएर प्रयोग गर्न नमिल्ने भएको छ ? त्यसो हो भने नागरिकताको प्रतिलिपि बनाउन गृहजिल्ला जानुपर्ने बाध्यता अब हटेको छ ।
सरकारले जुनसुकै जिल्लाबाट नागरिकताको प्रतिलिपि लिन सकिने व्यवस्था गरेसँगै काठमाडौं उपत्यकामा बसोबास गर्ने नागरिकले पनि आफू बसेकै ठाउँबाट सेवा लिन सक्ने भएका छन्। नेपाल नागरिकता (पाँचौं संशोधन) नियमावली, २०८३ र सरकारको १०० बुँदे शासकीय सुधार कार्यसूचीअनुसार यो व्यवस्था कार्यान्वयनमा ल्याइएको हो । गृह मन्त्रालयको परिपत्रअनुसार काठमाडौं उपत्यकामा तीन जिल्ला प्रशासन कार्यालयबाट प्रदेशअनुसार नागरिकता लिने व्यवस्था मिलाइएको छ।
कहाँबाट लिने नागरिकताको प्रतिलिपि ?
जिल्ला प्रशासन कार्यालय, काठमाडौं वा त्यसअन्तर्गतबाट बागमती, गण्डकी र लुम्बिनी प्रदेश अन्र्तगत जिल्लाका नागरिकले सेवा लिन सक्नेछन् । त्यस्तै, जिल्ला प्रशासन कार्यालय, ललितपुर वा त्यसअन्तर्गतबाट कर्णाली र सुदूरपश्चिम प्रदेशका नागरिकले यो सेवा पाउनेछन्। जिल्ला प्रशासन कार्यालय, भक्तपुर वा त्यसअन्तर्गतबाट भने कोशी र मधेश प्रदेशका नागरिकले नागरिकताको प्रतिलिजि निकाल्न सक्नेछन् ।
तर, प्रतिलिपि जारी गर्न नागरिकताको विवरण राष्ट्रिय परिचय व्यवस्थापन सूचना प्रणाली र केन्द्रीय नागरिकता सूचना व्यवस्थापन प्रणालीमा रहेको अभिलेखसँग हुबहु मिल्नुपर्नेछ। नत्र प्रतिलिपि निकाल्न पाइने छैन । अभिलेख नमिलेमा, नाम, थर वा जन्ममितिलगायतका विवरण सच्याउनुपर्ने भएमा वा नागरिकता शंकास्पद देखिएमा भने सम्बन्धित व्यक्तिले पहिला नागरिकता जारी भएको जिल्लामै पुगेर सम्पर्क गर्नुपर्ने गृहको परिपत्रमा उल्लेख छ ।
प्रतिक्रिया दिनुहोस्