काठमाडौं । एलपी ग्यास बिक्री गर्दा उपभोक्तालाई अनिवार्य रूपमा भ्याट बिल दिनुपर्ने नेपाल आयल निगमको निर्देशनलाई ग्यास विक्रेता महासंघ नेपालले स्वागत गरेको छ। महासंघले निगमको निर्णयले ग्यास कारोबारलाई व्यवस्थित, पारदर्शी र सुरक्षित बनाउन सहयोग पुग्ने जनाएको छ ।
महासंघले बुधबार विज्ञप्ति जारी गर्दै निगमको निर्देशन पूर्ण रूपमा कार्यान्वयन गर्न ग्यास व्यवसायीलाई आग्रह भनेको हो । नेपाल आयल निगमको एलपी ग्यास तथा एभिएसन विभागले ९ गते सबै ग्यास उद्योगलाई पत्राचार गर्दै ग्यास बिक्रीपछि अनिवार्य रूपमा भ्याट बिल जारी गर्ने व्यवस्था मिलाउन निर्देशन दिएको थियो । ग्यास बिक्री गरेपछि उपभोक्तालाई बिलबिजक नदिएको गुनासो बढेपछि निगमले यस्तो कदम चालेको हो ।
निगमले यसअघि पनि २०८१ साउन ३० र माघ १० गते सम्बन्धित संघसंस्थालाई भ्याट बिल जारी गर्ने व्यवस्था कार्यान्वयनका लागि पत्राचार गरेको भएपनि त्यो पूर्णरुपमा कार्यान्वयनमा आएको थिएन । महासंघका अध्यक्ष ज्ञानेश्वर अर्यालले सबै ग्यास व्यवसायीलाई निगमको निर्देशन पूर्ण रूपमा पालना गर्न आग्रह गरेका छन् । उनले उपभोक्तालाई पनि ग्यास खरिद गर्दा बिक्रेतासँग अनिवार्य रूपमा बिल माग्न र बिल लिने बानी बसाल्न अनुरोध गरेका छन् ।
ग्यास खरिद तथा बिक्रीमा बिलबिजक जारी गर्ने व्यवस्था प्रभावकारी रूपमा कार्यान्वयन भए कारोबारको अभिलेख व्यवस्थित गर्न र बजारमा पारदर्शिता कायम गर्न सहयोग पुग्ने अपेक्षा निगमको छ।
प्रतिक्रिया दिनुहोस्