कर्पोरेट समाचार 
काठमाडौं ।नेपाल राष्ट्र बैंकको गभर्नर छनोट समितिले पूर्णता पाएको छ। बुधबार बसेको मन्त्रिपरिषद बैठकले निवर्तमान गभर्नर महाप्रसाद अधिकारीलाई समिति सदस्यमा नियुक्त गर्ने निर्णय गरेको हो।
पूर्वगभर्नर विजयनाथ भट्टराईले वैशाख ९ गते राजीनामा दिएपछि रिक्त भएको स्थानमा अधिकारीलाई नियुक्त गरिएको हो। अधिकारीलाई गभर्नर चयनको जिम्मेवारी दिइएको एक मन्त्रीले जानकारी दिएका छन्।
भट्टराईले समिति संयोजक अर्थमन्त्री विष्णुप्रसाद पौडेलले एकपल्ट पनि बैठक नबोलाएको र आफू ूरबर स्टाम्पू बन्न नसक्ने भन्दै राजीनामा दिएका थिए। समितिमा अर्का सदस्यका रूपमा डा। विश्व पौडेल छन्।
नेपाल राष्ट्र बैंक ऐनअनुसार गभर्नर छनोट समितिमा एक जना पूर्वगभर्नर अनिवार्य सदस्य हुनुपर्ने प्रावधान छ। सोही प्रावधानअनुसार सरकारले अधिकारीलाई समितिमा ल्याएको हो।
गभर्नर महाप्रसाद अधिकारीको कार्यकाल चैत २४ गते सकिएपछि राष्ट्र बैंक नेतृत्व रिक्त छ। करीब एक महिनासम्म गभर्नर नियुक्ति हुन नसक्नुमा नेकपा एमाले र नेपाली कांग्रेसबीचको मतभेद मुख्य कारण मानिएको छ।
त्यसैबीच, गभर्नर नियुक्तिसम्बन्धी मापदण्ड संशोधनविरुद्ध दायर मुद्दामा सर्वोच्च अदालतले बुधबार मापदण्ड कार्यान्वयन नगर्नु भन्ने अन्तरिम आदेशलाई निरन्तरता दिएको छ। कार्यकारी निर्देशक डा. गुणाकर भट्टको योग्यता नपुग्ने भनेर दायर गरिएको पूरक निवेदन भने सर्वोच्चले अस्वीकृत गरेको छ।
पछिल्लो समय सत्तारूढ दलहरूबीच डा। भट्टलाई गभर्नर बनाउने सहमति बनेको बताइएको छ। तर, भट्टले कार्यकारी निर्देशक पदबाट दिएको राजीनामा कार्यवाहक गभर्नर डा. नीलम ढुंगाना तिम्सिनाले अझै स्वीकृत गरेकी छैनन्।
प्रतिक्रिया दिनुहोस्