कर्पोरेट समाचार 
डुम्रे (तनहुँ) । नेपाली काङ्ग्रेसका प्रवक्ता डा प्रकाशशरण महतले बेथितिको अन्त्यका लागि अनावश्यक बजेट बाड्ने पद्धती हटाउनुपर्ने बताएका छन् ।
नेपाली कांग्रेस तनहुँद्वारा आज वीपी स्मृति भवन दमौलीमा आयोजित समसामयिक विषयमा अन्तर संवाद कार्यक्रमलाई सम्बोधन गर्दै उनले तल्लो तहदेखि माथि सम्म जिम्मेवारीमा रहेका नेतृत्व तह सुधारिन आवश्यक रहेको बताए । प्रवक्ता महतले भने “अब हरेक तहका नेतृत्वले जिम्मेवारी पुरा गर्नुपर्छ । सुधारिनुपर्छ भनेर आत्मसात गरी कर्तव्यबोध हुनुपर्छ । माथिल्लो तहदेखि तल्लो तहसम्मका नेतृत्व सुधारिन आवश्यक रहेको छ । ”
केन्द्र सरकारले तीन करोड रुपैयाँभन्दा कम बजेटको योजना स्वीकृत नगर्ने र प्रदेश सरकारले एक करोडभन्दा कम योजनाको काम नगर्ने प्रावधान बनाउन सकेमा मात्रै नेतृत्वले कर्तव्यबोध गर्ने धारणा उनको छ । “नेतृत्वप्रतिको अविश्वास र आक्रोस न्यूनीकरण गर्नुपर्छ र नेतृत्व पनि कर्तव्यबोध हुनसक्नुपर्छ,” महतले भने ।
यस्तै उनले नेता कार्यकर्तामा लोकप्रियताका लागि सामाजिक सञ्जालको प्रयोग हुँदै आएको टिप्पणी गर्दै उनले नेतृत्व वर्ग लोकप्रियताको पछि लाग्नु नहुने धारणा राखे । “सबै पार्टीका नेतृत्व लोकप्रियताको पछि लाग्नु हुँदैन । भविष्यलाई मजबुत बनाउने गरी नेतृत्वले कर्तव्यबोध भएर काम गर्न सचेत हुनुपर्छ ।”
प्रतिक्रिया दिनुहोस्