काठमाडौं। नेपाल औषधि आयातकर्ता संघ (मियान) को अध्यक्षमा पवन आचार्य सर्वसम्मत चयन भएका छन् । शनिबार सम्पन्न संघको आठौँ वार्षिक साधारणसभा तथा अधिवेशनले आचार्यको नेतृत्वमा आगामी तीन वर्षे कार्यकालका लागि १९ सदस्यीय नयाँ कार्यसमिति निर्विरोध चयन गरेको हो ।
नयाँ नेतृत्व चयन भएसँगै संघले सरकारसमक्ष औषधि मूल्य नीतिसम्बन्धी प्रतिवेदनमा आफ्नो गम्भीर असहमति प्रकट गरेको छ । नवनिर्वाचित अध्यक्ष आचार्यले पदभार ग्रहण गरेलगत्तै पोषराज पाण्डे नेतृत्वको कार्यदलले तयार पारेको प्रतिवेदन अव्यावहारिक र समस्याग्रस्त रहेको भन्दै त्यसलाई नसच्याई कार्यान्वयन गर्न नहुनेमा जोड दिएका छन् । ‘उक्त प्रतिवेदनमा थुप्रै त्रुटि छन्, त्यसले आयातकर्ता र उपभोक्ता दुवैलाई असर गर्छ,’ अध्यक्ष आचार्यले भने, ‘सरोकारवालासँग विस्तृत छलफल गरी परिमार्जन गरेर मात्रै यसलाई अघि बढाउनुपर्छ ।’
संघको नयाँ कार्यसमितिमा उपाध्यक्षद्वयमा पृथ्वीराज वैद्य र सुमन कयाल चयन भएका छन् । यसअघि महासचिव रहेका आचार्य अध्यक्ष बनेपछि रिक्त महासचिव पदमा मधु पौडेलले जिम्मेवारी पाएका छन् । त्यसैगरी, सचिवमा सुरेश अग्रवाल र कोषाध्यक्षमा सन्दीप खनाल सर्वसम्मत निर्वाचित भएका छन् ।
कार्यसमिति सदस्यहरूमा मुकुन्द राजभण्डारी, शितोष शाह, डा। आनन्दा राजभण्डारी, सुशीलकुमार श्रेष्ठ, महेन्द्र श्रेष्ठ, ख्वाजा तारिक राना, नीरजकुमार झा, सुरज टिवटिवाल, चन्द्रशेखर रुँगटा, डा। अब्बुल हुसेन अन्सारी, राज किशोर र आनन्द चौधरी चयन भएको निर्वाचन समिति संयोजक लालबहादुर बोहराले जानकारी दिए । संघको कार्यसमितिमा सबै पदाधिकारी तथा सदस्यहरू निर्विरोध निर्वाचित हुनुले व्यवसायीबीच उच्च एकता रहेको सन्देश दिएको छ ।
कार्यक्रममा प्रमुख अतिथिका रूपमा उपस्थित स्वास्थ्य तथा जनसंख्या मन्त्रालयका सचिव डा. विकास देवकोटाले औषधिको मूल्यसँगै यसको गुणस्तर सबैभन्दा महत्वपूर्ण पक्ष भएको बताए । उनले भने, ‘औषधि जस्तो संवेदनशील वस्तुको गुणस्तरमा कुनै पनि सम्झौता हुनुहुँदैन । यसमा सबै व्यवसायीले पहिलो प्राथमिकता दिनुहोस् ।’
प्रतिक्रिया दिनुहोस्