काठमाडाैं । नेपालमा सञ्चालनमा रहेका क्यासिनोले अब विदेशी मुद्रा कारोबार गर्न राष्ट्र बैंकबाट इजाजतपत्र लिनुपर्ने भएको छ । शुक्रबार एक सूचना जारी गर्दै राष्ट्र बैंकले यस्तो बताएको हो ।
राष्ट्र बैंकले क्यासिनोलाई विदेशी विनिमयको कारोबार गर्न इजाजतपत्र प्रदान गर्ने सम्बन्धमा नेपाल राष्ट्र बैंक विदेशी विनिमय कारोबार इजाजतपत्र तथा निरीक्षण विनियमावली, २०७७ को परिच्छेद ४ मा गरेको व्यवस्था अनुसार इजाजतपत्र लिनुपर्ने जनाएको हो ।
राष्ट्र बैंक सञ्चालक समितिको २०८० मंसिर १२ को बैठकले गरेको व्यवस्था अनुसार उक्त विनियिमावली अनुसार क्यासिनोलाई विदेशी मुद्राको कारोबारमा इजाजत लिनुपर्ने व्यवस्था गरेको हो ।
केन्द्रीय बैंकले विदेशी विनिमय (नियमित गर्ने) ऐन, २०१९ को दफा ३ बमोजिम यस बैंकबाट इजाजतपत्र लिएर विदेशी विनिमयको कारोबार गर्नुपर्ने व्यवस्था विद्यमान रहेको छ । सोही व्यवस्था बमोजिम विदेशी विनिमयको इजाजतपत्र प्रदान गर्ने सम्बन्धमा संस्थाहरूको प्रकृति अनुसार यस बैंकले विभिन्न विनियमावलीहरू समेत जारी गरेको छ ।
ऐनको उल्लिखित व्यवस्था बमोजिम क्यासिनो लगायतका संस्थाहरूले यस बैंकबाट इजाजतपत्र लिएर मात्र विदेशी विनिमय (भारतीय मुद्रा समेत) को कारोबार गर्न र गराउन विदेशी विनिमय (नियमित गर्ने) ऐन, २०१९ को दफा १२ अनुसार क्यासिनोको लागि राष्ट्र बैंकले उक्त व्यवस्था गरेको हो ।
प्रतिक्रिया दिनुहोस्