काठमाडौं । नेपाल इन्फ्रास्ट्रक्चर बैंक (निफ्रा)ले लाभांश गायब भएको विषयमा भुलसुधार गरेको छ। यसअघि बैंकले साधारण सभामा लाभांश प्रस्ताव नगरी साधारण सभा बोलाएको थियो । बैंकले ६.३१ प्रतिशत लाभांश वितरण गर्ने प्रस्ताव छुटेको भन्दै आज भुलसुधार गरेको छ।
सञ्चालक समितिको भदौ १९ गते बसेको बैठकले गत आर्थिक वर्ष २०८१/८२ को नाफाबाट हाल कायम चुक्ता पुँजी २१ अर्ब ६० करोड रुपैयाँको करसहित ६.३१ प्रतिशतले लाभांश दिने उल्लेख थियो । बैंकले कुल १ अर्ब ३६ करोड ४२ लाख १२ हजार रुपैयाँ नगद लाभांश प्रस्ताव गरेको थियो। तर, बैंकले प्रकाशित गरेको साधारण सभा सम्बन्धी सूचनामा भने उक्त लाभांश प्रस्ताव राखिएको थिएन।
बैंक सञ्चालक समितिको मंसिर १ गते बसेको बैठकले सातौं वार्षिक साधारण सभा मंसिर २३ गते बिहान ९ बजेलाई काठमाडौंमा बोलाएको छ। बैंकले यसअघि भएको भुलसुधार गर्दै सातौं वार्षिक साधारण सभा प्रस्तावको बुँदा नं.४ मा भुलवस छुटेको जनाएको छ ।
यस्तै, बैंकको २३ गते बस्ने सभाले आर्थिक वर्ष २०८१/८२ को सञ्चालक समितिको प्रतिवेदन, लेखापरीक्षकको प्रतिवेदनमाथि छलफल गरी स्वीकृत गर्नुका साथै पारिश्रमिक तोक्ने लगायतका प्रस्तावहरु पारित गर्नेछ ।
साथै, सर्वसाधारण शेयरधनी समूहबाट प्रतिनिधित्व गर्ने २ जना संचालक नियुक्त गर्न सभामा निर्वाचन गर्ने एजेण्डा छ ।
प्रतिक्रिया दिनुहोस्