काठमाडौं। नवनियुक्त श्रम, रोजगार तथा सामाजिक सुरक्षामन्त्रीमा राजेन्द्रसिंह भण्डारीले पदभार ग्रहण गरेका छन् । शुक्रबार राष्ट्रपति रामचन्द्र पौडेलबाट पद तथा गोपनीयताको शपथ लिए लगत्तै उनले सिंहदरबारस्थित मन्त्रालय पुगेर पदवहाली गरेका हुन् ।
पदभारपछि उनले जेनजी आन्दोलनमा सहभागी संगठित गिरोहहरुलाई कठोर कारवाही गर्नुपर्नेमा जोड दिए । आफूसँग सुरक्षा क्षेत्रको अनुभव भएका कारणले पनि गिरोहको जालो तोड्न सकिने उनको विश्वास छ ।
त्यस्तै उनले भाषण गर्ने भन्दापनि एक्सनमा उत्रिने बताए । उनले भने,‘जतिपनि संगठित गिरोहहरु छन् । तिनीहरुलाई कठोर कारवाही गर्नुपर्छ । यो जालो तोड्नैपर्छ । त्यसमा मेरो अनुभवले काम गर्छ भन्नेमा विश्वास छ। लामो भाषण गरेर भन्दापनि एक्सनमा काम गरेर जनतालाई सुशासनको अनुभूति गराउनुपर्ने छ ।’
उनले आन्दोलनमा जेनजीहरुको पीडा जस्तै प्रहरीहरुको पनि भएको कारण सुरक्षा क्षेत्रको आवाजलाई मन्त्रालयमा लैजान आफू चुनिएको बताए । ‘आन्दोलनमा जुन खालको जेनजीहरुको पीडा छ, उत्तिकै प्रहरीहरुको पनि छ । दुईवटै क्षेत्रले ठूलो क्षति व्यहोर्नु परेको छ । त्यसैले सुरक्षा क्षेत्रको आवाजलाई पनि मन्त्रालयमा कसरी लैजान सकिन्छ भनेर भनेर मलाई छनोट गरिएको हुनसक्छ ।’
प्रधानमन्त्री सुशीला कार्कीको सिफारिसमा उनी शुक्रबार मन्त्री नियुक्त भएका हुन् ।
प्रतिक्रिया दिनुहोस्