काठमाडौं । निर्जीवन बीमा कम्पनीहरूले जेनजी आन्दोलनका क्रममा भएका भौतिक तथा अन्य क्षतिको दाबी भुक्तानी प्रकृयालाई कछुवा गतिमै सिमित बनाएका छन् । निर्जीवन बीमा कम्पनीहरूले कुल ३ हजार २५५ वटा बीमा दाबीको २३ अर्ब ४३ करोड ४१ लाख रुपैयाँ भुक्तानी गर्नुपर्नेमा हालसम्म अग्रिम भुक्तानी समेत गरी ४ अर्ब २ करोड रुपैयाँ दाबी रकम बीमितहरूलाई भुक्तानी गरेका छन् ।
नेपाल बीमा प्राधिकरणका अनुसार निर्जीवन बीमा कम्पनीहरूबाट प्राप्त अद्यावधिक तथ्याङ्क अनुसार, कम्पनीहरूबाट अग्रिम भुक्तानी समेत गरी भुक्तानी भएको कुल दाबी रकममध्ये सम्पत्ति बीमातर्फ ६९५ वटा दाबीको १९ अर्ब ३ करोड ४१ लाखमध्ये ३ अर्ब ९ करोड ४७ लाख रुपैयाँ भुक्तानी भएको छ । मोटर बीमातर्फ २ हजार २९५ वटा ३ अर्ब ४४ करोड १० लाख रुपैयाँ बराबरको दाबी परेकामा ८४ करोड ८५ लाख रुपैयाँ बीमा कम्पनीहरुले भुक्तानी गरेका छन् ।
यसैगरी, इञ्जिनीयरिङ तथा ठेक्का जोखिम बीमातर्फ २०९ वटा दाबीको ५५ करोड ४ लाख रुपैयाँ दाबी परेको छ । उक्त रकममध्ये ६ करोड ६९ लाख रुपैयाँ भुक्तानी भएको छ । परिवहन बीमातर्फ १२ वटा दाबी परेकामा कुल १ करोड ६९ लाख रकममध्ये बीमकले ४८ लाख रुपैयाँ र अन्य बीमातर्फ ४४ वटा दाबीको ३९ करोड १८ लाख दाबी रकममध्ये ३९ लाख रुपैयाँ अग्रिम भुक्तानी समेत गरी रकम भुक्तानी भएको छ ।
पुनर्बीमा कम्पनीले गरयो २ अर्ब ५१ करोड अग्रिम दाबी भुक्तानी
यसैबीच जेनजी आन्दोलनका क्रममा भएका भौतिक तथा अन्य क्षतिको बीमा दाबी भुक्तानीका लागि नेपाल पुनर्बीमा कम्पनीले निर्जीवन बीमा कम्पनीहरूलाई २ अर्ब ५१ करोड ७९ लाख रुपैयाँ अग्रिम भुक्तानी दाबी गरेको छ। अद्यावधिक तथ्याङ्क अनुसार नेपाल पुनर्बीमा कम्पनीमा परेको कुल २ हजार ८६० वटा पुर्नबीमा दाबीमा १५ अर्ब ८१ करोड रुपैयाँ रहेको प्राधिकरणका कार्यकारी निर्देशक एवं प्रवक्ता सुशीम देव सुवेदीले जानकारी दिए ।
प्रतिक्रिया दिनुहोस्