कर्पोरेट समाचार 
काठमाडौं । नेपाली कांग्रेसका पूर्वसभापति शेरबहादुर देउवा निकट पक्षले आगामी बैशाखका लागि तय भएको १५औं महाधिवेशनलाई नै ‘एकताको अधिवेशन’ का रूपमा अघि बढाउने रणनीति बनाएको छ ।
मंगलबार भएको देउवा पक्षीय विस्तारित बैठकमा पार्टी एकताको पहल स्वरुप मंसिरको बैठकले तय गरेको बैशाखकै मितिमा १५औं महाधिवेशन सम्पन्न गर्ने गरी छलफल गरेको हो । नेता मीन विश्वकर्माले पार्टीलाई वैधानिक संकटबाट जोगाउन र सबैलाई गोलवद्ध गर्न बैशाखकै महाधिवेशन उपयुक्त विकल्प भएको बताए ।
विस्तारित भेला पार्टीभित्र देखिएको विवाद समाधान गर्दै एकता कायम गर्ने मुख्य उद्देश्यसहित अगाडि बढेको उनको भनाइ छ । उनले भने, ‘नियमित महाधिवेशन वैशाख मसान्तमा तोकिएको थियो। त्यो समय पनि आइसकेको छ, त्यसका बारेमा के गर्ने र पार्टीलाई निर्वाचन आयोग र अदालतले वैधानिकता अद्यावधिक गरेर गगन थापा नेतृत्वको कांग्रेसलाई कार्यसमितिलाई वैधानिकता दिइसकेपछि बाँकी साथीहरूलाई अब कसरी पार्टी एकताका लागि क्रियाशील बनाउने र कसरी गर्ने भन्ने विषयमा छलफल केन्द्रित भएको छ।’
त्यस्तै, अर्का नेता कुन्दनराज काफ्लेले देशको पछिल्लो राजनीतिक परिस्थिति र निर्वाचनपछिको समीक्षा बैठकको प्राथमिकतामा परेको जानकारी दिए । उनले राष्ट्रिय सभा संसदीय दलको नेता कृष्णप्रसाद सिटौलालाई हटाउने चर्चालाई नियमित प्रक्रिया भएको टिप्पणी गरे ।
प्रतिक्रिया दिनुहोस्