काठमाडौं । प्रहरी महानिरीक्षक दानबहादुर कार्कीसँग एसिया प्यासिफिक ग्रुप अन मनी लाउन्डरिङ (एपीजी) का प्रतिनिधिमण्डलले सोमबार भेटवार्ता गरेको छ ।
प्रहरी प्रधान कार्यालय नक्सालमा भएको भेटमा नेपाललाई सम्पत्ति शुद्धीकरणसम्बन्धी सघन निगरानी सूची ‘ग्रे लिस्ट’बाट बाहिर निकाल्न सरकारले चालिरहेका कदम तथा कार्ययोजनाको कार्यान्वयनबारे छलफल भएको थियो ।
प्रहरी महानिरीक्षक कार्कीले सम्पत्ति शुद्धीकरण निवारण प्रणालीलाई प्रभावकारी बनाउन नेपाल प्रहरीले अन्य सरोकारवाला निकायसँग समन्वय गर्दै कारबाहीलाई तीव्र बनाएको जानकारी दिएका थिए । उनले वित्तीय अपराध नियन्त्रणमा नेपाल प्रहरीको भूमिकाबारे पनि प्रतिनिधिमण्डललाई अवगत गराएका थिए ।
भेटका क्रममा प्रहरी कर्मचारीको क्षमता अभिवृद्धि, प्राविधिक सहयोग, सूचना आदान–प्रदान तथा आगामी कार्यदिशाबारे समेत दुई पक्षबीच छलफल भएको प्रहरी प्रधान कार्यालयले जनाएको छ ।
एपीजीका डेपुटी एक्जुकेटिभ सेक्रेटरी डेभिड श्यानन र पोलिसी अफिसर किया सासल सहभागी रहेको उक्त भेटमा वित्तीय अपराध नियन्त्रणका लागि अन्तरराष्ट्रिय समन्वय र आपसी सहकार्यलाई थप सुदृढ बनाउने प्रतिबद्धता व्यक्त गरिएको थियो ।
भेटमा वित्तीय जानकारी एकाइका पदाधिकारी, प्रधानमन्त्री तथा मन्त्रिपरिषद्को कार्यालयका सहसचिव, नेपाल राष्ट्र बैंकका निर्देशक तथा नेपाल प्रहरीका अधिकारीहरूको सहभागिता रहेको थियो ।
प्रतिक्रिया दिनुहोस्