काठमाडौं । अर्थमन्त्री डा. स्वर्णिम वाग्ले ले बजेटका सिद्धान्त र प्राथमिकतामाथि उठेका प्रश्नहरूको जवाफ दिँदै निजी क्षेत्रप्रति सरकारको दृष्टिकोण स्पष्ट पारेका छन्। प्रतिनिधिसभामा बोल्दै उनले इमानदार र लगानीमुखी निजी क्षेत्रलाई कुनै पनि प्रकारको डर नराख्न आग्रह गरे भने राज्य संयन्त्रको दुरुपयोग गर्ने प्रवृत्तिप्रति कडा चेतावनी दिएका छन्।
उनका अनुसार सरकारले लगानी, उद्यम र उत्पादन विस्तारलाई केन्द्रमा राख्दै निजी क्षेत्रलाई प्रोत्साहन गर्ने नीति लिएको छ। ‘सरकार स्वयं घर–घर, ढोका–ढोकामा पुगेर लगानी, उद्यम र उत्पादन विस्तारका लागि आह्वान गर्दैछ,’ उनले भने।
तर उनले नीति, राज्य संयन्त्र र सार्वजनिक संस्थालाई कब्जा गरेर सीमित समूहले फाइदा उठाउने प्रवृत्तिलाई अब सहन नगर्ने स्पष्ट संकेत दिए। ‘आसेपासे मिलेमतो, नीतिगत कब्जा र दोहनको चक्रबाट राज्यलाई मुक्त गर्नु हाम्रो मूल उद्देश्य हो,’ अर्थमन्त्री वाग्लेले भने।
उनले सरकार सुशासन, पारदर्शिता र सार्वजनिक स्रोतको न्यायोचित वितरणतर्फ उन्मुख रहेको उल्लेख गर्दै गलत अभ्यासहरूलाई रोक्न सरकार पछि नहट्ने बताए। ‘गलतलाई गलत भन्न र रोक्न सरकार पछि हट्दैन,’ उनको भनाइ थियो।
विपक्षी सांसदहरूलाई सम्बोधन गर्दै उनले आलोचनालाई रचनात्मक बनाउन आग्रह गरे। विकास र सुधारको यात्रामा अवरोध होइन, सहयात्री बन्न उनले आह्वान गरे। ‘हाम्रो यात्रा अवरोध गर्न होइन, साथ दिन हो,’ उनले भने।
सरकारको नीति, कार्यक्रम र बजेटबीच पूर्ण अपनत्व हुनेगरी आगामी बजेट पनि यही दिशामा केन्द्रित हुने संकेत दिएका छन्।
प्रतिक्रिया दिनुहोस्