कर्पोरेट समाचार 
नेपालगञ्ज । बुद्धएयरले करिब पाँच वर्षदेखि सञ्चालन गर्दै आएको नेपालगञ्ज–पोखरा सिधा उडान अस्थायी रूपमा स्थगित गरेको छ । भारतीय धार्मिक पर्यटकको सङ्ख्या घट्नु र इन्धन खर्च बढ्नुका कारण उडान एक महिनाका लागि रोकिएको कम्पनीले जनाएको छ ।
बुद्धएयर नेपालगञ्ज स्टेशनका प्रमुख विनितविक्रम शाहका अनुसार मलमासका कारण भारतबाट आउने धार्मिक पर्यटकको चाप घटेको र इन्धन मूल्य महँगिएकाले नेपालगञ्ज–पोखरा उडान केही समयका लागि स्थगित गरिएको हो । मंगलबारदेखि उडान रोकिएको उनले जानकारी दिए ।
पर्यटन प्रवर्द्धन तथा भारतीय यात्रुलाई सहजता दिने उद्देश्यले विसं २०७८ साउन १७ गतेदेखि सातामा तीन दिन उक्त उडान सञ्चालन हुँदै आएको थियो ।
उडान स्थगित भएपछि पश्चिम नेपालका यात्रु, पर्यटन व्यवसायी र सर्वसाधारण निराश बनेका छन् । अब यात्रुले फेरि सडकमार्गबाट करिब १४ घण्टाको यात्रा गर्नुपर्ने अवस्था आएको छ ।
एशोसिएसन अफ टुर्स एण्ड ट्राभल्स एजेन्ट्स (नाट्टा) को पहलमा सुरु भएको उक्त सेवाले पोखराबाट नेपालगञ्ज हुँदै बर्दिया राष्ट्रिय निकुञ्ज, कर्णाली चिसापानी र रारा ताल जस्ता पर्यटकीय गन्तव्यमा पुग्न सहज बनाएको थियो । साथै भारतका लखनउ, कानपुर र दिल्लीबाट आउने पर्यटकलाई पनि पोखरा पुग्न सुविधा भएको थियो ।
नाट्टा नेपालगञ्जका संस्थापक अध्यक्ष श्रीराम सिग्देलले बुद्धएयरले नियमित तालिकाअनुसारको उडान रोकेको जानकारी आएको बताए । निजी क्षेत्रको पहलमा सञ्चालनमा आएको सेवा सरकारी सहयोग अभावका कारण बन्द हुने अवस्थामा पुगेको उनको भनाइ छ ।
बुद्धएयरले १८ सिट क्षमताको बीचक्राफ्ट १९०० डी सिरिज विमानमार्फत सेवा दिँदै आएको थियो । उडान सुरु हुँदा न्यूनतम भाडा चार हजार ९३५ रुपैयाँदेखि अधिकतम सात हजार ६३५ रुपैयाँसम्म निर्धारण गरिएको थियो ।
कम्पनीका अनुसार इन्धन मूल्यवृद्धिपछि भाडादर समायोजन गर्दा यात्रु चाप घटेकाले सेवा स्थगित गर्नुपरेको हो । यात्रु सङ्ख्या बढेमा पुनः नियमित उडान सञ्चालन गर्ने सम्भावना रहेको जनाइएको छ ।
प्रतिक्रिया दिनुहोस्