कर्पोरेट समाचार 
काठमाडौं । चिनियाँ अटोमोबाइल जायन्ट डोङफेङ मोटरको एक सहायक कम्पनीले आफ्नो प्रिमियम विद्युतीय सवारी (ईभी) ब्रान्ड भोया अटोमोटिभ (HKEX: 7489) मा आफ्नो हिस्सेदारी थप बढाएको छ। यस रणनीतिक कदमसँगै डोङफेङले भोयामाथिको आफ्नो नियन्त्रण अझ बलियो बनाएको हो।
भोया अटोमोटिभले बुधबार जारी गरेको आधिकारिक जानकारी अनुसार, डोङफेङ मोटर (हङकङ) इन्टरनेशनलले सेकेन्डरी बजार मार्फत कम्पनीका २ करोड १ लाख ९० हजार ‘एच’शेयर खरिद गरेको छ। यो संख्या ईभी निर्माता भोयाको कुल जारी शेयर पूँजीको करिब ०.५५ प्रतिशत हुन आउँछ।
यो नयाँ शेयर खरिद योजना सफलतापूर्वक कार्यान्वयन भए भोया अटोमोटिभमा डोङफेङ मोटर र यससँग सम्बन्धित भगिनी निकायहरूको संयुक्त हिस्सेदारी बढेर ७०.०२ प्रतिशत पुग्नेछ । हालको तथ्याङ्क अनुसार, कम्पनीको घरेलु शेयर २ अर्ब ४३ करोड ८० लाखभन्दा बढी र एच शेयर करिब १३ करोड ८० लाख रहेको छ।
डोङफेङले सन् २०२० को अन्त्यतिर सार्वजनिक गरी सन् २०२१ मा औपचारिक रूपमा स्थापना गरेको ‘भोया’ ले मुख्य रूपमा २ लाख युआनदेखि ५ लाख युआन (करिब २९,४५० देखि ७३,६०० अमेरिकी डलर) मूल्य वर्गका प्रिमियम ईभीहरू उत्पादन गर्दै आएको छ।
यसअघि, अगस्ट २०२५ मा डोङफेङले भोयालाई ‘लिस्टिङ बाइ इन्ट्रोडक्सन’ प्रक्रियामार्फत हङकङ स्टक एक्सचेन्जमा सूचीकृत गर्ने घोषणा गरेको थियो। सोही योजना अनुरूप, यसै वर्ष मार्च १९, २०२६ मा भोया आधिकारिक रूपमा ०७४८९ स्टक कोड अन्तर्गत हङकङ बजारमा सूचीकृत भएको थियो।
लिस्टिङ बाइ इन्ट्रोडक्सन भनेको के हो ?
यो पहिले नै जारी भइसकेका शेयरहरूलाई स्टक बजारमा कारोबारका लागि उपलब्ध गराउने एक विशेष प्रक्रिया हो। यसमा कम्पनीले कुनै नयाँ शेयर जारी गर्दैन र बजारबाट नयाँ पूँजी पनि संकलन गर्दैन। केवल विद्यमान शेयरधनीहरूसँग भएका शेयरहरू मात्र बजारमा किनबेचका लागि खुल्ला गरिन्छ।
यसैगरी, डोङफेङले भोयालाई अगाडि बढाएसँगै आफैंलाई भने निजीकरण गरी बजारबाट हटाउने रणनीति लिएको थियो। कम्पनीको मूल्याङ्कनमा देखिएको सीमितताका कारण डोङफेङले आफ्नै सूचीकरण पछि कुनै इक्विटी रिफाइनान्सिङ गर्न सकेको थिएन, जसका कारण उसको H शेयर प्लेटफर्मको फाइनान्सिङ उपयोगिता लगभग समाप्त भएको थियो। यही कारणले भोयालाई नयाँ हतियारका रूपमा अघि सारिएको हो।
बजारमा बलियो पकड बनाउँदै गएको भोयाले वित्तीय रूपमा पनि सबल बन्दै गएको कम्पनीले जनाएको छ। कम्पनीले सन् २०२५ मा ठूलो सफलता हासिल गर्दै १ अर्ब २ करोड युआन खुद नाफा कमाउन सफल भएको विवरण सार्वजनिक गरेको छ।
प्रतिक्रिया दिनुहोस्