नारायणगढ। चितवनस्थितसाल्ट ट्रेडिङ कनर्पोरेस शाखा कार्यालयले चालु आर्थिक वर्ष २०८२/८३ मा हालसम्म ८५ हजारभन्दा बढी बोरा रासायनिक मल बिक्री वितरण गरेको जनाएको छ । कार्यालयका अनुसार जिल्लामा ३५ हजार ८३८ बोरा युरिया, ४४ हजार ९४४ बोरा डीएपी र चार हजार ९४३ बोरा पोटास बिक्री भइसकेको छ ।
हाल कार्यालयबाट नौ हजार २०० बोरा युरिया र एक हजार बोरा डीएपी बिक्री भइरहेको छ । थप वितरणका लागि सात हजार ८०२ बोरा युरिया, दुई हजार ८६६ बोरा डीएपी र १२ हजार ४२५ बोरा पोटास मौज्दात रहेको कार्यालयले जनाएको छ ।
शाखा कार्यालय प्रमुख बुद्धिविनोद दाहालका अनुसार सरकारले तोकेको अनुदानित मूल्यमा सूचीकृत बिक्रेतामार्फत रासायनिक मल बिक्री वितरण भइरहेको छ । हाल ५० केजी युरियाको मूल्य ८४७ रुपैयाँ, डीएपीको दुई हजार २९७ रुपैयाँ र पोटासको एक हजार ६९७ रुपैयाँ कायम गरिएको छ ।
कार्यालयले रोपाइँको मुख्य याममा किसानलाई मल अभाव हुन नदिन स्थानीय तहको सिफारिसका आधारमा समयमै अनुदानित मल उपलब्ध गराउँदै आएको जनाएको छ । कर्पोरेसनले सरकारबाट प्राप्त जिम्मेवारीअनुसार कठिन परिस्थितिमा समेत मल आपूर्तिलाई निरन्तरता दिएको दाबी गरेको छ ।
मल वितरणलाई थप पारदर्शी बनाउन जिल्लाका सबै बिक्रेतालाई ‘किसान व्यवस्थापन प्रणाली’ सफ्टवेयरमा किसानले खरिद गरेको मलको विवरण अनिवार्य रूपमा प्रविष्ट गराउने तयारी गरिएको छ । यससम्बन्धी प्राविधिक तालिम प्रमुख जिल्ला अधिकारीको संयोजकत्व र कृषि ज्ञान केन्द्रको समन्वयमा प्रदान गरिसकिएको कार्यालयले जनाएको छ ।
साल्ट ट्रेडिङले राष्ट्रिय मागको करिब ३० प्रतिशत रासायनिक मल आपूर्ति गर्ने जिम्मेवारी पाएको छ । यस वर्ष रोपाइँका समयमा डीएपी मलको माग बढेका कारण केही समय आपूर्तिमा चाप परेको भए पनि युरिया मलको पर्याप्त व्यवस्था गरिएको कार्यालयले जनाएको छ ।
गत आर्थिक वर्ष चितवनमा ४२ हजार २०१ बोरा युरिया, २१ हजार ५८४ बोरा डीएपी र एक हजार ८४२ बोरा पोटास बिक्री वितरण भएको थियो।
प्रतिक्रिया दिनुहोस्