काठमाडौं । बेलायतमा बसोबास गर्दै आएका गैरआवासीय नेपाली उत्तम नेपालले नेपाल सरकारलाई एक करोड रुपैयाँ आर्थिक सहयोग गरेका छन्। त्यस्तै, बेलायतमै रहेका गैरआवासीय नेपाली कुल आचार्यले सरकारलाई डीएनए परीक्षण किट हस्तान्तरण गरेका छन् ।
परराष्ट्र मन्त्रालयमा आज आयोजित कार्यक्रममा परराष्ट्रमन्त्री शिशिर खनाललाई नेपालले एक करोड रुपैयाँको चेक र आचार्यले डीएनए परीक्षण किट हस्तान्तरण गरेका हुन्।
कार्यक्रममा मन्त्री खनालले सहयोगका लागि दुवै जनाप्रति आभार व्यक्त गर्दै प्राप्त आर्थिक सहायता र डीएनए परीक्षण किटले सरकारको अनुसन्धान तथा डीएनए परीक्षणसम्बन्धी क्षमता अभिवृद्धि गर्न सहयोग पुग्ने विश्वास व्यक्त गरे । उक्त आर्थिक सहयोग भोटेकोशी बाढीले पुर्याएको असरबाट प्रभावित नागरिकको पुर्नस्थापनार्थ दिइएको हो ।
सरकारको अनुसन्धान कार्यलाई थप प्रभावकारी बनाउन आर्थिक सहयोग र आवश्यक परीक्षण सामग्रीको उपलब्धताले महत्त्वपूर्ण भूमिका खेल्ने उनको भनाइ थियो । चेक हस्तान्तरण कार्यक्रममा प्रतिनिधिसभा सदस्य विदुषी राणा, गैरआवासीय नेपाली संघ (एनआरएनए) का प्रतिनिधि तथा परराष्ट्र मन्त्रालयका वरिष्ठ अधिकारीहरूको उपस्थिति थियो।
प्रतिक्रिया दिनुहोस्