काठमाडौं । मुक्तिनाथ विकास बैंक लिमिटेडले आफ्नो बैंकिङ पूर्वाधारलाई आधुनिक र प्रविधिमैत्री बनाउने उद्देश्यले पुमोरी नेक्स्टजेन कोर बैंकिङ प्रणाली कार्यान्वयन गर्ने भएको छ। यसका लागि बैंक र इन्फोडेभलपर्स प्रा.लि.बीच समझदारीपत्रमा हस्ताक्षर भएको छ ।
समझदारीपत्रमा मुक्तिनाथ विकास बैंकका प्रमुख सञ्चालन अधिकृत (सीओओ) प्रेम थापा र इन्फोडेभलपर्सका प्रमुख कार्यकारी अधिकृत (सीईओ) प्रजय नेपालले हालै हस्ताक्षर गरेका हुन् । नेपालको वित्तीय क्षेत्रमा डिजिटल प्रविधिको क्षमता अभिवृद्धि तथा आधुनिक वित्तीय पूर्वाधार निर्माण गर्ने उद्देश्यसहित भएको यस सहकार्यलाई बैंकिङ सेवाको डिजिटल रूपान्तरणतर्फको महत्त्वपूर्ण पहलका रूपमा हेरिएको छ ।
इन्फोडेभलपर्सले विकास गरेको पुमोरी नेक्स्टजेन आधुनिक वेबमा आधारित तथा पूर्ण रूपमा एपीआई एकीकृत कोर बैंकिङ प्लेटफर्म हो । यसले बैंकिङ सञ्चालनलाई थप प्रभावकारी, सुरक्षित र विस्तारयोग्य बनाउनुका साथै विभिन्न वित्तीय सेवाको व्यवस्थापनलाई सहज बनाउनेछ । यस प्रणालीको एपीआईमा आधारित संरचनामार्फत डिजिटल बैंकिङ च्यानल, तेस्रो पक्षका एप्लिकेसन, भुक्तानी गेटवे तथा अन्य इन्टरप्राइज प्रणालीसँग सहज रूपमा एकीकरण गर्न सकिनेछ । नयाँ प्रणालीको कार्यान्वयनपछि मुक्तिनाथ विकास बैंकको कोर बैंकिङ पूर्वाधार थप आधुनिक र प्रविधिमैत्री बन्ने अपेक्षा गरिएको छ ।
प्रतिक्रिया दिनुहोस्