काठमाडौं । विश्व वातावरण दिवस २०२५ को अवसरमा संस्कृति अन्तर्राष्ट्रिय विद्यालयले जेन गुडल संस्थान नेपालसँगको सहकार्यमा वृक्षारोपण कार्यक्रम सम्पन्न गरेको छ।
असार १ गते शनिबार, काठमाडौंको शंखमूलस्थित संयुक्त राष्ट्र पार्क नजिकै आयोजित कार्यक्रममा विद्यालयका विद्यार्थी, शिक्षक, अभिभावक तथा कर्मचारीहरूको उल्लेखनीय सहभागिता रहेको थियो।
‘यो केवल नयाँ रूख रोप्ने कार्य होइन, पुराना रूखहरू बचाउने प्रयास हो,’ कार्यक्रममा बोल्दै जेन गुडल संस्थान नेपालका वन निर्माता तथा ‘द रिभोलुसन प्रोजेक्ट’का सह–संस्थापक आयुष देव पन्तले भने। ‘काठमाडौंमा हराउँदै गएका रूखहरूलाई पुनःस्थापित गर्न हामी एक–एक रूख प्रायोजन गर्दैछौं,’ उनले थपे।
कार्यक्रमअन्तर्गत संस्कृति विद्यालयले १९ विभिन्न स्वदेशी प्रजातिका १२३ वटा रूखहरू रोपे, जुन विद्यालय समुदायको हरियालीप्रतिको प्रतिबद्धता र समावेशी सहभागिताको प्रतिबिम्ब थियो।
प्राथमिकदेखि माध्यमिक तहसम्मका विद्यार्थीहरू सक्रिय रूपमा सहभागी भए। उनीहरूले रूख रोप्ने प्रक्रियामार्फत माटो, जीवन चक्र, वातावरणीय सन्तुलन र दिगोपनको महत्व प्रत्यक्ष रूपमा अनुभव गरे।
कक्षा १० का विद्यार्थी पार्थले भने, ‘यस परियोजनापछि स्थानीय वातावरणमा सकारात्मक परिवर्तन देख्ने आशा गर्छु।’ त्यस्तै, नवौं कक्षाका आदितले भने, ‘वातावरण संरक्षणमा योगदान दिएकोमा गर्व लागिरहेको छ। हामीले वन पुनर्स्थापना गर्नैपर्छ।
संस्कृति विद्यालयका अनुसार यो कार्यक्रम एक पटकको गतिविधि मात्रै नभई दीर्घकालीन शिक्षा र दिगोपनप्रति प्रतिबद्धताको एउटा उदाहरण हो। कार्यमुखी सिकाइ र सामाजिक उत्तरदायित्वलाई शिक्षा प्रणालीमा समेट्ने विद्यालयको दृष्टिकोण अनुसार, यस्तो प्रयासले विद्यार्थीहरूलाई जिम्मेवार नागरिक बन्न प्रेरित गर्ने विश्वास लिइएको छ।
प्रतिक्रिया दिनुहोस्