काठमाडौं । प्रधानमन्त्री केपी शर्मा ओलीले रासायनिक मलको सहज आपूर्ति, खेतीको अवस्थालगायत विषयमा आज कृषि तथा पशुपंक्षी विकासमन्त्री, सचिव र सम्बन्धित निकायका अधिकारीसँग छलफल गर्ने भएका छन् ।
छलफलका लागि प्रधानमन्त्रीले मंगलबार दिउँसो कृषिमन्त्री रामनाथ अधिकारी, सचिव डा गोविन्दप्रसाद शर्मा र कृषि सामग्री कम्पनी लिमिटेडका पदाधिकारीलाई प्रधानमन्त्री तथा मन्त्रिपरिषद्को कार्यालय, सिंहदबारमा बोलाएको उनको सचिवालयले जनाएको छ ।
किसानलाई आवश्यक पर्ने मलको मौज्दात हुँदा र थप मल आउने क्रम जारी रहँदा पनि किसानले समयमा मल नपाएको गुनासो आएपछि प्रधानमन्त्री ओलीले समस्या समाधानका लागि सरोकारवालासँग बसेर छलफल गर्न लागेका हुन् ।
यसअघि प्रधानमन्त्री ओलीले खेतीपातीको समय सुरु हुनु अगावै मलको व्यवस्था गरी किसानलाई सहज रुपमा उपलब्ध गराउन आग्रह गरेका थिए । मल अभावको समस्या समाधान गर्न नेपालमै रासायनिक मल उत्पादन कारखाना खोल्न तथा प्राङ्गारिक मलको उत्पादन र प्रयोग बढाउने योजना ल्याउन समेत कृषि मन्त्रालयलाई प्रधानमन्त्री ओलीले निर्देशन दिएका थिए ।
प्रतिक्रिया दिनुहोस्