काठमाडौं । जेनेसिस भेन्चर्स लिमिटेडले सर्वसाधारणका लागि प्रारम्भिक सार्वजनिक निष्काशन (आईपीओ) जारी गर्ने प्रक्रिया अगाडि बढाएको छ । कम्पनीले आफ्नो प्रस्तावित २५ लाख कित्ता साधारण शेयर निष्काशन तथा बिक्री व्यवस्थापनका लागि लक्ष्मी सनराईज क्यापिटल लिमिटेडलाई निष्काशन तथा बिक्री प्रबन्धकको रूपमा नियुक्त गरेको हो ।
यससम्बन्धी सम्झौता पत्रमा लक्ष्मी सनराईज क्यापिटलका प्रमुख कार्यकारी अधिकृत विजयलाल श्रेष्ठ र जेनेसिस भेन्चर्स लिमिटेडका अध्यक्ष अनुज राठीले दुवै संस्थाका वरिष्ठ प्रतिनिधिहरूको उपस्थितिमा हस्ताक्षर गरेका छन् ।
सम्झौता अनुसार अब जेनेसिस भेन्चर्सको आगामी आईपीओ निष्काशन सम्बन्धी सम्पूर्ण व्यवस्थापकीय कार्यहरू लक्ष्मी सनराईज क्यापिटलले गर्नेछ। यो साझेदारीले नेपालको पूँजी बजारलाई थप सुदृढ बनाउनुका साथै आम सर्वसाधारणका लागि लगानीको नयाँ र सुरक्षित अवसरहरू विस्तार गर्ने साझा प्रतिबद्धतालाई प्रतिबिम्बित गरेको दुवै कम्पनीले जनाएका छन् ।
जेनेसिस भेन्चर्स लिमिटेड एक निजी बाजार लगानी कम्पनी हो, जसको मुख्य कार्य नेपालका सूचीकरण नभएका इक्विटी अवसरहरूमा रणनीतिक लगानी गर्नु हो। कम्पनीले विशेष गरी उच्च–बृद्धि सम्भावना भएका क्षेत्रहरू र दीर्घकालीन मूल्य सिर्जना गर्न सक्ने व्यवसायहरू पहिचान गरी तिनमा लगानी केन्द्रित गर्दै आएको छ।
प्रतिक्रिया दिनुहोस्