काठमाडौं । दिगोले युलेन्स स्कुललाई १६ सिट क्षमताका ४० वटा विद्युतीय भ्यान हस्तान्तरण गरेको छ।
बिहीबार चिनियाँ सवारी निर्माता कम्पनी सीएचटीसीका प्रतिनिधि झु सियानसोङले दिगो र स्कुलका प्रतिनिधिहरूको उपस्थितिमा भ्यान हस्तान्तरण गरेका हुन्। विद्यालयको यातायात सेवालाई स्वच्छ, प्रभावकारी र वातावरणमैत्री बनाउने उद्देश्यले भ्यानहरू सञ्चालनमा ल्याउन लागिएको हो। यी भ्यानले सञ्चालन खर्च घटाउनुका साथै ध्वनि प्रदूषण र कार्बन उत्सर्जन न्यूनीकरणमा सहयोग पुर्याउने अपेक्षा गरिएको छ।
दिगोका समूह प्रमुख कार्यकारी अधिकृत सौरभ श्रेष्ठले युलेन्स स्कुलले देखाएको विश्वासले नेपालमा विद्युतीय सवारीसाधनको विस्तार र समग्र विद्युतीय सवारी प्रणाली निर्माणमा थप प्रोत्साहन मिलेको बताए। त्यस्तै, स्कुलकी प्रधानाध्यापक एकता सिंह राणाले विद्युतीय भ्यानको समावेशले विद्यालयको यातायात सेवालाई प्रभावकारी र वातावरणप्रति जिम्मेवार बनाउन सहयोग पुग्ने बताइन्।
प्रतिक्रिया दिनुहोस्