काठमाडौं। नेपाल कपडा तथा सिलाइ व्यवसायी महासंघको आयोजनामा विजयादशमी, शुभ दीपावली, नेपाल संवत् ११४७ तथा छठ पर्वको पावन अवसरमा शुभकामना आदान–प्रदान तथा चियापान कार्यक्रम भव्यताका साथ सम्पन्न भएको छ।
पूर्वमन्त्री तथा प्रमुख सल्लाहकार जीतु गौतमको प्रमुख आतिथ्यता तथा महासंघका केन्द्रीय अध्यक्ष रामकृष्ण श्रेष्ठको सभापतित्वमा कार्यक्रम सम्पन्न भएको हो।
कार्यक्रममा महासंघका अध्यक्ष रामकृष्ण श्रेष्ठले नेपाली मौलिक संस्कृति, परम्परा र चाडपर्वको संरक्षणसँगै कपडा तथा सिलाइ व्यवसायमा आबद्ध सम्पूर्ण व्यवसायीलाई एउटै संस्थागत छातामुनि एकताबद्ध गर्दै व्यवसायीहरूको हकहित, पेसागत सम्मान र आर्थिक समृद्धिका लागि महासंघ प्रतिबद्ध रहेको बताए ।
उनले कपडा तथा सिलाइ व्यवसाय केवल जीविकोपार्जनको माध्यम मात्र नभई नेपाली मौलिक पहिचान, सीप, कला, संस्कृति र उद्यमशीलतासँग जोडिएको महत्त्वपूर्ण क्षेत्र भएको उल्लेख गर्दै यस क्षेत्रको संरक्षण, प्रवर्द्धन र आधुनिकीकरणका लागि सबै व्यवसायी एकजुट हुनुपर्नेमा जोड दिए ।
साथै, स्वदेशी उत्पादनको प्रयोग र प्रवर्द्धन, दक्ष जनशक्ति उत्पादन, सीप विकास, आधुनिक प्रविधिको उपयोग तथा व्यवसायीमैत्री नीतिनिर्माणका लागि महासंघले सम्बन्धित निकायसँग समन्वय र पहल गर्दै अघि बढ्ने प्रतिबद्धता व्यक्त गरे ।
प्रमुख अतिथि जीतु गौतमज्यूले व्यवसायीहरूको एकता, सहकार्य र संस्थागत मजबुती नै समग्र क्षेत्रको विकासको आधार भएको उल्लेख गर्दै महासंघलाई अझ सशक्त, प्रभावकारी र व्यवसायीको साझा आवाजका रूपमा स्थापित गर्नुपर्ने धारणा राखे ।
कार्यक्रममा महासंघका उपाध्यक्ष प्रेम महर्जन, कोषाध्यक्ष राज कार्की, स्थायी कमिटी सदस्य तथा राष्ट्रिय महिला उद्यमी समितिकी सचिव श्रीमती संगीता लामिछाने, बागमती प्रदेश संयोजक श्री भीम दर्नाल, केन्द्रीय सदस्यद्वय ताराबहादुर परियार र रामप्यारा छिनाल, काठमाडौं जिल्ला अध्यक्ष उद्धवबहादुर थापा मगरज्यूलगायत महासंघका विभिन्न तह र तप्कामा रहेका पदाधिकारी तथा सदस्यहरूको उल्लेखनीय उपस्थिति रहेको थियो।
त्यसैगरी महासंघअन्तर्गतका विभिन्न प्रदेश, जिल्ला संघ तथा राष्ट्रिय महिला उद्यमी समितिमा आबद्ध पदाधिकारी एवं सदस्यहरूको सहभागिता रहेको थियो।
यस कार्यक्रमले कपडा तथा सिलाइ व्यवसायीहरूबीच एकता, सहकार्य र संस्थागत एकजुटताको महत्त्वलाई थप उजागर गरेको छ। व्यवसायीहरूका साझा समस्या, चुनौती र अवसरलाई सामूहिक रूपमा पहिचान गरी समाधानका लागि एकीकृत आवाज उठाउने, स्वदेशी कपडा तथा सिलाइ व्यवसायको संरक्षण र प्रवर्द्धन गर्ने, परम्परागत सीपलाई आधुनिक प्रविधिसँग जोड्ने तथा नयाँ पुस्तालाई यस पेसाप्रति आकर्षित गर्ने दिशामा महासंघले नेतृत्वदायी भूमिका निर्वाह गर्नुपर्ने सन्देश दिएको छ।
त्यसैगरी महिला उद्यमशीलताको विकास, सीपमूलक रोजगारी सिर्जना, व्यवसायीको पेसागत सुरक्षा, सम्मान र आर्थिक आत्मनिर्भरताका लागि सबै तहका संघसंस्था तथा व्यवसायीबीच सहकार्य अपरिहार्य रहेको विषयलाई पनि कार्यक्रमले प्राथमिकताका साथ उठाएको छ।
एकता नै शक्ति हो, सहकार्य नै विकासको आधार हो र स्वदेशी सीप तथा उत्पादनको प्रवर्द्धन नै समृद्धिको बाटो हो भन्ने भावनालाई आत्मसात् गर्दै महासंघले समग्र कपडा तथा सिलाइ व्यवसायको संस्थागत विकास र व्यवसायीहरूको साझा हितका लागि निरन्तर क्रियाशील रहने प्रतिबद्धता व्यक्त गरेको छ।
आपसी सद्भाव, एकता, भाइचारा र संस्थागत सम्बन्धलाई थप सुदृढ बनाउने उद्देश्यले आयोजित उक्त कार्यक्रम सौहार्दपूर्ण वातावरणमा सम्पन्न भएको हो। महासंघले कार्यक्रममा उपस्थित सम्पूर्ण अतिथि, पदाधिकारी, सदस्य तथा शुभेच्छुकहरूप्रति हार्दिक आभार व्यक्त गरेको छ।















प्रतिक्रिया दिनुहोस्