काठमाडौं । एसईई परीक्षा दिएर बसेका विद्यार्थीहरूका लागि आयोजित ‘Website Design & Development Competition 2081’ को फाइनल नतिजा सार्वजनिक गरिएको छ। आइतबार काठमाडौंको नाचघर, जमलमा आयोजित भव्य कार्यक्रममार्फत प्रतियोगिताको उत्कृष्ट ३ विजेताको घोषणा गरियो।
लाइफ कम्प्युटरको आयोजनामा भएको यो राष्ट्रिय प्रतियोगितामा कुल ९८१ वटा वेबसाइटहरू प्राप्त भएका थिए। प्रारम्भिक स्क्रिनिङपछि उत्कृष्ट २० प्रतियोगी छनोट गरिए, जसबाट डिजाइन, यूआई/यूएक्स, कन्टेन्ट र कार्यक्षमताका आधारमा उत्कृष्ट १० छनोट गरिए। फाइनल राउण्डमा ती १० मध्येबाट उत्कृष्ट तीन विजेताहरूलाई छनोट गरी घोषणा गरिएको हो।
प्रतियोगितामा प्रथम स्थान आइडियल मोडल स्कुल, जाउलाखेलका प्रसुन भट्टले हात पार्न सफल भए। दोस्रो स्थान आदर्श सौल युवक स्कुल, ललितपुरका सुशील खड्का र तेस्रो स्थान श्री सुन्दरी सेकेन्डरी स्कुल, धादिङका आदेश भण्डारीले प्राप्त गरे।
कार्यक्रमका प्रमुख अतिथि नेपाल विद्युत प्राधिकरणका पूर्व कार्यकारी निर्देशक कुलमान घिसिङ थिए। साथै, गायक आनन्द कार्की र कमेडियन हिमेश पन्तको विशेष प्रस्तुति कार्यक्रममा थप आकर्षण बनेको थियो।
लाइफ कम्प्युटरका प्रमुख कार्यकारी अधिकृत रमेश पोखरेलले प्रतियोगिताको उद्देश्यबारे प्रस्ट पार्दै भने, ‘वेबसाइट विकासको स्किल अबको पुस्ताका लागि अनिवार्य जस्तै छ। प्रतिस्पर्धा त केवल बहाना हो, हामीले ध्यान दिनुपर्ने कुरा भनेको विद्यार्थीको सीप विकास हो।’
कार्यक्रम संयोजक तथा प्रबन्ध निर्देशक लक्ष्मी खत्रीले प्रतियोगिता सञ्चालनको सम्पूर्ण प्रक्रिया पारदर्शी रूपमा गरिएको उल्लेख गर्दै भनिन्, ‘भोलिको पुस्ताका लागि लर्न एण्ड लन्च प्लेटफर्मको नमुना स्वरूप यो प्रतियोगिता स्थापित भएको छ।’
टप १० मा स्थान बनाएका प्रतियोगीहरू काठमाडौँ, बुटवल, धादिङ, ललितपुर र लोलाङ लगायतका स्थानका विद्यार्थी थिए। उनीहरूलाई प्रमाणपत्र, ट्रफी, गिफ्ट ह्याम्पर र विशेष पुरस्कार प्रदान गरिएको थियो।
आयोजक संस्थाका अनुसार आगामी वर्षदेखि प्रतियोगितालाई जिल्लास्तरसम्म विस्तार गर्दै प्रविधिमा चासो राख्ने किशोरकिशोरीहरूलाई थप सहभागी गराइने योजना छ। प्रतिस्पर्धामार्फत प्राविधिक शिक्षा र व्यावहारिक सीपको पहुँच विद्यालय तहमै पुर्याउने लक्ष्य आयोजकको रहेको छ।
प्रतिक्रिया दिनुहोस्