गण्डकी । पोखरामा रात्रिकालीन व्यवसायमा देखिएका विकृति नियन्त्रण गर्न प्रभावकारी अनुगमन आवश्यक रहेको भन्दै पर्यटनसम्बद्ध संघसंस्थाले माग गरेका छन्।
होटल संघ पोखरा नेपालका अध्यक्ष लक्ष्मण सुवेदी नेतृत्वको टोलीले कास्कीका प्रमुख जिल्ला अधिकारी रुद्रादेवी शर्मालाई ध्यानाकर्षणपत्र बुझाउँदै रात्रिकालीन व्यवसायमा अनुगमन कडाइ गर्न आग्रह गरेको हो।
टोलीले यसअघि लागू गरिएको ४२ बुँदे आचारसंहिताको प्रभावकारी कार्यान्वयन नहुँदा होहल्ला, ध्वनि प्रदूषण र असामाजिक गतिविधि बढेको भन्दै शान्ति सुरक्षामा असर परेको जनाएको छ।
पोखरालाई २०८० चैत ४ गते पर्यटकीय राजधानी घोषणा गरिएपछि जिल्ला प्रशासन कार्यालयको समन्वयमा २४ घण्टा व्यवसाय सञ्चालन गर्न दिने सहमति भए पनि नियम पालना कमजोर भएको संघसंस्थाको भनाइ छ।
उनीहरूले राति २ बजेपछि रात्रिकालीन व्यवसाय सञ्चालनमा रोक लगाउनुपर्ने समेत माग गरेका छन्।
प्रतिक्रिया दिनुहोस्