काठमाडौं । सिद्धार्थ बैंकले ‘सिद्धार्थ फोनपे भर्चुअल क्रेडिट कार्ड’ सार्वजनिक गरेको छ। फोनपेसँगको साझेदारीमा पूर्ण डिजिटल क्रेडिट कार्ड बैंकले सार्वजनिक गरेको जनाएको छ । उक्त कार्डको सार्वजनिकिकरण नेपाल प्रिमियर लिग दोस्रो संस्करणको अवसरमा आयोजित अन–ग्राउन्ड कार्यक्रममा गरिएको हो ।
नयाँ भर्चुअल क्रेडिट कार्डमार्फत ग्राहकहरूले भौतिक कार्ड बिना नै फोनपे क्युआर चलाउने देशभरका १८ लाखभन्दा बढी व्यापारीहरूमा छिटो, सुरक्षित र सम्पर्कसहित भुक्तानी गर्न सक्नेछन्। डिजिटल रूपमा सक्रिय ग्राहकहरूको आवश्यकता ध्यानमा राखी ल्याइएको यो कार्डमा नियन्त्रण तथा उच्च सुरक्षा सुविधा उपलब्ध छ भने ग्राहकलाई तुरुन्त उपलब्ध गराउने बैंकले जनाएको छ ।
बैंकका अनुसार ग्राहकले मोबाइल बैंकिङ एपमार्फत कार्डका लागि आवेदन दिएपछि तुरुन्तै कार्ड पाउन सक्नेछन् । साथै, एपबाटै सीमा व्यवस्थापन, कार्ड लक–अनलक, स्टेटमेन्ट जाँच, भुक्तानी तथा अन्य आवश्यक व्यवस्थापनकार्य सरल रूपमा गर्न सकिने बैंकको भनाइ छ ।
बैंकले कार्डको विशेष लन्च अफरअन्तर्गत, सिद्धार्थ फोनपे भर्चुअल क्रेडिट कार्डमार्फत गरिने प्रत्येक कारोबारमा ५० प्रतिशत क्यासब्याकको व्यवस्था गरिएको जनाएको छ। यो क्यासब्याक अधिकतम ७५० रुपैयाँ सम्म सीमित हुनेछ, जसले सदस्यता शुल्क समायोजन गर्ने सुविधा पनि प्रदान गर्छ । अफर ७ डिसेम्बर २०२५ देखि ७ जनवरी २०२६ सम्म सीमित अवधिका लागि लागू हुनेछ ।
‘सिद्धार्थ फोनपे भर्चुअल क्रेडिट कार्ड’ सेवासम्बन्धी थप जानकारीका लागि बैंकको २४ घण्टा सञ्चालन हुने ग्राहक सेवा केन्द्र ‘सिद्धार्थ केयर’ मा सम्पर्क गर्न सकिने बैंकले जनाएको छ ।
प्रतिक्रिया दिनुहोस्