कर्पोरेट समाचार 
एजेन्सी । इरानका सर्वोच्च नेता मोजताबा खामेनेईको स्वास्थ्य अवस्थाबारे फैलिएका विभिन्न आशङ्का र बाह्य अड्कलबाजीलाई इरानी पक्षले कडा शब्दमा खारेज गरेको छ। नेता खामेनेईका एक वरिष्ठ सहयोगीले उनी पूर्ण रूपमा सुरक्षित, स्वस्थ र सक्रिय रहेको दाबी गरेका छन् ।
खामेनेईको कार्यालयका एक वरिष्ठ सहयोगीले खामेनेईबारे अमेरिकी दाबी र बाह्य अड्कलबाजीलाई खारेज गर्दै इरानी पक्षले यस्तो सूचना ‘मनोवैज्ञानिक दबाब सिर्जना गर्ने प्रयास’ भएको जनाएको छ । सर्वोच्च नेताको कार्यालयसँग सम्बद्ध तथा विशेषज्ञ सभाका सदस्य उप अयातुल्ला मोहसेन कोमीले खामेनेईको स्वास्थ्यबारे उठाइएका प्रश्नहरूलाई पश्चिमी रणनीतिको हिस्सा भएको टिप्पणी गरेका छन् । उनका अनुसार नेताको सार्वजनिक उपस्थिति नदेखिएको विषयलाई आधार बनाएर शत्रुपक्षले भ्रम फैलाउने प्रयास गरिरहेको छ ।
कोमीले भने, ‘केहीले नेताको स्वास्थ्यबारे जिज्ञासा राखिरहेका छन्, तर यस्तो प्रश्न उठाउनु नै शत्रुको योजना हो । उहाँ किन देखिनुहुन्न्, किन सन्देश आउँदैन भन्ने विषय उठाएर प्रतिक्रिया उक्साउने प्रयास भइरहेको छ ।’ उनका अनुसार हाल इरानी नेतृत्वको मुख्य प्राथमिकता सर्वोच्च नेताको सुरक्षा सुनिश्चित गर्नु हो । केही चोटपटक लागे पनि खामेनेई सुरक्षित रहेको र अवस्था नियन्त्रणमा रहेको उनको भनाइ छ । ‘उहाँ घाइते हुनुभएको थियो, तर अहिले पूर्ण रूपमा स्वस्थ हुनुहुन्छ र सक्रिय रूपमा जिम्मेवारी सम्हालिरहनुभएको छ’, कोमीले भनेका छन् ।
कोमीले बम आक्रमण भएको भवनमा खामेनेई उपस्थित रहेको पुष्टि गर्दै संयोगवश ठूलो क्षतिबाट जोगिएको बताएका छन् । विस्फोट हुनुभन्दा केही मिनेटअघि उनले स्थान परिवर्तन गरेका कारण ज्यान जोगिएको दाबी गरिएको छ । उक्त घटनामा अन्य व्यक्तिहरूको मृत्यु भएको उल्लेख छ । हाल खामेनेईले वार्ता, क्षेत्रीय गतिविधि र रणनीतिक निर्णयहरू प्रत्यक्ष रूपमा निगरानी गरिरहेको कोमीको दाबी छ । उनका अनुसार सर्वोच्च नेताले वार्ताकार टोलीलाई विभिन्न परिस्थितिमा कसरी अघि बढ्ने भन्नेबारे स्पष्ट निर्देशनसमेत दिइसकेका छन् ।
यसअघि भारतस्थित इरानी प्रतिनिधि मोहम्मद हुसेन जियेनियाले पनि खामेनेईको स्वास्थ्य अवस्था राम्रो रहेको बताएका थिए । यद्यपि, अन्तर्राष्ट्रिय सञ्चारमाध्यमहरूले भने फरक सन्दर्भ प्रस्तुत गरेका छन् । फेब्रुअरी २८ मा पूर्व सर्वोच्च नेता अली खामेनेईको परिसरमा भएको हवाई आक्रमणपछि मोजताबा खामेनेई सार्वजनिक रूपमा कम देखिएको उल्लेख गरिएको छ । उक्त आक्रमणमा उनका परिवारका सदस्यहरू समेत मारिएको रिपोर्ट गरिएको थियो ।
त्यसपछि उनको पहुँच सीमित गरिएको र उपचार प्रक्रियामा रहेको खबरहरू बाहिरिएका थिए । सीमित व्यक्तिहरू—विशेषगरी चिकित्सकहरू-उनको सम्पर्कमा रहेको बताइएको थियो । यद्यपि इरानी अधिकारीहरूले पछिल्ला सबै अड्कलबाजीलाई अस्वीकार गर्दै नेता पूर्ण रूपमा सक्रिय रहेको दाबी दोहोर्याएका छन् ।
प्रतिक्रिया दिनुहोस्