काठमाडौं । नेकपा एमालेको ११ औँ राष्ट्रिय महाधिवेशनको बन्दसत्र सुरु हुनुअघि सम्पन्न बैठकले १० औँ महाधिवेशनमा कायम केन्द्रीय कमिटी तीनसय एक सदस्यीय हुने निर्णय गरेको छ ।
बैठकमा अध्यक्ष केपी शर्मा ओलीले उक्त निर्णयबारे जानकारी दिएका हुन् । वरिष्ठ उपाध्यक्ष ईश्वर पोखरेललगायत विधान महाधिवेशनबाट पारित विषयलाई नचलाउन माग गरेको भए पनि बहुमतले १० औँ महाधिवेशनअनुसार नै कायम गर्ने निर्णय भएको छ ।
बन्दसत्र सुरु हुनुअघि आइतबार सम्पन्न बैठकले विधान संशोधन गर्ने निर्णय गरेसँगै अब केन्द्रीय कमिटीबाट पारित उक्त निर्णय महाधिवेशनको हलमा प्रस्तुत हुने छ । विधान संशोधन भएर बन्ने नयाँ पदाधिकारीको संख्या १९ कायम गरिने बताइएको छ। जसमा अध्यक्ष संख्या–१, उपाध्यक्ष ५, महासचिव १, उपमहासचिव ३, सचिव ९ जना रहने छन् ।
यसअघि एमालेको पदाधिकारी संख्या १९ नै रहेकामा गत भदौमा भएको विधान महाधिवेशनले १९ बाट पदाधिकारी संख्या घटाएर १५ बनाउने निर्णय लिएको थियो ।
यस्तै, आजको बैठकमा एमाले अध्यक्ष केपी शर्मा ओलीले महाधिवेशन उद्घाटन समारोहमा भएको पार्टी कार्यकर्ताको उपस्थितिले देशमा राजनीतिक दलको औचित्य रहेको पुष्टि भएको तर्क गरेका थिए । यस्तै, बैठकमा महासचिव शङ्कर पोखरेलले बन्दसत्रमा प्रस्तुत गरिने निर्वाचन कार्यतालिका, आचारसंहिता, समसामयिकलगायत एजेण्डा प्रस्तुत गरेका थिए ।
प्रतिक्रिया दिनुहोस्